हेटौंडाः राष्ट्रिय सभा सदस्य निर्वाचन अन्तर्गत बागमती प्रदेशबाट २ सदस्य पदका लागि अहिले प्रदेश राजधानी हेटौंडामा मतदान प्रक्रिया सुरु भएको छ । देशभर १९ सदस्यका लागि भएको चुनावमा बागमती प्रदेशबाट एक अन्य र एक महिला सदस्य पदका लागि मतदान भइरहेको छ ।
बिहान ९ बजेबाट हेटौंडा औद्योगिक क्षेत्रमा सुरु भएको मतदान कार्यक्रममा बागमती प्रदेशभरमा ११९ स्थानीय तहका २३७ जना प्रमुख तथा उपप्रमुख र १०९ जना प्रदेश सभा सदस्यहरुले मतदान गर्नुहुने सहायक निर्वाचन अधिकृत लुम्बनाथ पोखरेलले जानकारी दिनुभएको छ । निर्वाचनका लागि प्रदेश सभा र स्थानीय तहका लागि छुट्टाछुट्टै मतदान केन्द्र स्थापना गरिएको छ ।
वर्षाका कारण मतदान कार्यक्रम सुरुवातमै केही प्रभावित बनेपनि अहिले नियमित मतदान कार्य भइरहेको छ । मतदान कार्यक्रममा प्रदेश सभा सदस्यतर्फ जीवन खड्का र स्थानीय तहतर्फ निलकण्ठ नगरपालिकाका प्रमुख भीम प्रसाद ढुङ्गानाले सर्वप्रथम मतदान गर्नुभएको थियो । मतदान कार्यक्रम ३ बजेसम्म चल्ने र ४ बजेबाट मतगणना सुरु गरिने पोखरेलले बताउनुभयो । बगमती प्रदेशमा २ सदस्यका लागि ६ जनाको उम्मेदवारी रहेको छ ।
निर्वाचनमा ५ दलीय गठबन्धनका तर्फबाट महिला सदस्यमा नेकपा (एकीकृत समाजवादी) बाट गोमादेवी तिमल्सिना र अन्य सदस्यमा नेपाली कांग्रेसबाट कृष्ण प्रसाद पौडेलको उम्मेदवारी रहेको छ । यस्तै प्रमुख प्रतिपक्षी दल नेकपा एमालेबाट महिला सदस्यमा निरु कुमारी कुँवर र अन्य सदस्यमा गोपाल शाक्यको उम्मेदवारी छ भने नेपाल मजदुर किसान पार्टीबाट पनि महिला सदस्यमा गीता काफ्ले र अन्य सदस्यमा कृष्ण बहादुर तामाङको उम्मेदवारी रहेको छ ।
