हेटौंडाः लागुऔषध जस्तो देखिने पदार्थ सियोरेक्स १ सय ७९ बोतलसहित २ जनालाई मकवानपुर प्रहरीले पक्राउ गरेको छ । पक्राउ पर्नेमा बारा जिल्लाको बारागढी गाउँपालिका–४ का ३३ बर्षीय बसन्त राज चौधरी र २३ बर्षीय मुना चौधरी रहेको जिल्ला प्रहरी कार्यालय मकवानपुरले जनाएको छ ।
शुक्रबार साँझ ६ बजेर २० मिनेटको समयमा विशेष सूचनाको आधारमा जिल्ला प्रहरी कार्यालय मकवानपुरबाट खटिएको प्रहरी टोलीले पूर्वपश्चिम राजमार्गअन्तर्गत हेटौंडा–१५ रातोमाटेस्थित प्रहरी चेकपोष्टबाट उनीहरुलाई पक्राउ गरिएको हो । बारा जिल्लाबाट हेटौंडातर्फ आउँदै गरेको बा ५२ प ३९६४ नम्बरको मोटरसाईकललाई रोकी सुरक्षाजाँच गर्दा उनीहरुको साथमा रहेको झोलामा लुकाई छिपाई ल्याएको लागुऔषध जस्तो देखिने पदार्थ फेला परेको प्रहरीले जनाएको छ ।
मोटरसाइकल चालक राज चौधरी र मोटरसाइकलमा सवार मुना चौधरीलाई नियन्त्रणमा लिई थप अनुसन्धान भइरहेको जिल्ला प्रहरी कार्यालय मकवानपुरका प्रहरी प्रवक्ता जयश्वर रिमालले जानकारी दिनुभयो ।
