हेटौंडाः नेपाली कांग्रेसले आफ्नो नेतृत्वमा बागमती प्रदेशको सरकार गठनको प्रयास गर्ने भएको छ । आज हेटौंडामा बसेको कांग्रेस बागमती संसदीय दलको बैठकले कांग्रेसको नेतृत्वमा सरकार गठनको प्रयास गर्ने निर्णय गरेको सचेतक छिरिङ दोर्जे लामाले बताउनुभयो ।
उहाँका अनुसार पार्टीको केन्द्रमा र प्रदेशको अन्य विपक्षी दलहरुसँग छलफल गर्न संसदीय दलको नेता इन्द्र बानियाँलाई जिम्मेवादी दिइएको छ । यसअघि बानियाँ प्रदेशको मुख्यमन्त्री बन्ने दौडमा रहेको थिए । तर केन्द्रमा बनेको गठबन्धनले बागमती प्रदेशको नेतृत्व नेकपा एसले पाउने निर्णय गरिसकेको छ ।
गठबन्धनको आधिकारी निर्णय हालसम्म पनि प्रदेशको संसदीय दलमा नआएको कांग्रेस सचेतक छिरिङ दोर्जे लामाले जानकारी दिनुभयो । बागमती प्रदेशको नेतृत्व कांग्रेसले पाउनुपर्ने उहाँको भनाई छ । बागमती प्रदेशमा नेपाली कांग्रेसको २२ सांसद छन् । प्रदेशको सुरुवाती चरणबाट कांग्रेस प्रमुख विपक्षी दलको हैसियतमा प्रदेश सभामा बसेको थियो । बागमती प्रदेशमा कांग्रेस, समाजवादी र माओवादीको गठबन्धन अझै बनेको छैन । बागमती प्रदेशमा नेपाली कांग्रेस र एमाले मिलेर प्रदेशको नेतृत्व गर्ने चर्चा सुरु भएको छ ।
