हेटौंडाः बागमती प्रदेशको आन्तरिक मामिला तथा कानुन मन्त्री डा. अजय क्रान्ति शाक्यले प्रदेशको मातहतमा प्रदेश प्रहरी आउने बताउनुभएको छ । उहाँले त्यसको लागि केन्द्र सरकारसँग आफूले लबिङ गरिरहेको बताउनुभयो । बागमती प्रदेश प्रहरी अहिले प्रदेश सरकारको मातहतमा आइसकेको छैन । यस्तै प्रहरीको समायोजनसमेत हुन सकेको छैन ।
बागमती प्रदेशको १३ जिल्लामध्ये उपत्यकाका काठमाडौं, भक्तपुर र ललितपुरको सुरक्षा व्यवस्था केन्द्र सरकारले नै हेर्दै आएको छ । बाँकी प्रदेशको १० जिल्लाको शान्ति सुरक्षा बागमती प्रदेश प्रहरी कार्यालय हेटौंडाबाट हुँदै आएको छ ।
केन्द्र सरकारले उपत्यकाको सुरक्षा आफू मातहतमा राखेपनि प्रदेश मातहतमा ल्याउन पहल गर्ने मन्त्री शाक्यले बताउनुभयो । उहाँले प्रदेश सुरक्षा समितिको बैठक बसेर प्रदेशको शान्ति सुरक्षा चुस्त बनाउन प्रदेश प्रहरीलाई निर्देशनसमेत दिनुभएको छ । आन्तरिक मामिला तथा कानुन मन्त्री डा. शाक्यले आगामी निर्वाचनपछि मात्रै प्रहरी समायोजन अघि बढ्ने देखिएको बताउनुभयो ।
