हेटौंडाः मकवानपुर जिल्लामा उद्घोषण गर्न सक्ने व्यक्तिहरु ब्यापक बनाउनुपर्ने संविधान सभा सदस्य अनन्त पौडेलले बताउनुभएको छ । जिल्लाको १० वटै स्थानीय तहमा मानिसहरुको अघि उभिएर उद्घोषण गर्न सक्ने र कार्यक्रम संचालन गर्न सक्ने ब्यक्तिहरु सबै स्थानीय तहमा ब्यापक हुनुपर्ने उहाँले बताउनुभयो ।
मकवानपुरको दशै स्थानीय तहमा उद्घोषण तालिम दिन स्थानीय तहलाई आग्रह गर्ने भन्दै स्थानीय तहमै कार्यक्रम संचालन गर्न सक्नेहरु तयार गर्नुपर्ने आजको आवश्यकता रहेको औल्याउनुभयो ।
उद्घोषण कलाले नै सिंगो कार्यक्रमलाई कस्तो बनाउने भर पर्छ । कार्यक्रमलाई सुनिरहौ.जस्तो बनाउने की छोडेर हिड्न मन लाग्ने बनाउने उद्घोषणले तय गर्ने संविधान सभा सदस्य पौडेलको भनाई थियो ।
आफुपनि सानै उमेरबाट उद्घोषण गर्दै गर्दा राजनीतिमा जोडिन पुगेको उहाँले बताउनुभयो । मानिसहरुको भिडमा उभिएर बोल्न सक्ने बनाउन जिल्लाको दुर्गम र सुगमका नागरिकहरुलाई उद्घोषण तालिम दिनुपर्ने उहाँले बताउनुभयो । बिहीबार हेटौंडामा हजुरको खबर एण्ड मिडिया म्यानेजमेन्टको आयोजनामा भएको ३ दिने उद्घोषण तथा व्यक्तित्व विकास तालिमको समापनमा बोल्दै पौडेलले तालिमले अघि बढ्न टर्च लाइट प्रदान गरेको र टर्च बालेर अघि बढ्ने काम आफ्नै भएको बताउनुभयो ।
तालिममा मकवापनुरको राक्सिराङ गाउँपालिका लगायत कैलाश, मकवापनुरगढी लागयतको दुर्गम क्षेत्रबाट समेत गरेर २३ जनाले सहभागिता जनाएका थिए ।
असोज ५ गतेदेखि ७ गतेसम्म भएको तालिममा माइक हातमा लिन नसक्नेहरुले माइक समात्ने तहमा पुगेको, अगाडि आएर बोल्न नसक्नेहरु निर्धक्क बोल्न सक्ने देखिएको भन्दै यसलाई निरन्तरता दिन पौडेलले आग्रहसमेत गर्नुभयो । संविधान सभा सदस्य पौडेलले तालिम लिएकाहरुलाई आफु धर्तिमा बाचेको छु भनेर हस्ताक्षर गरेर मात्रै जानुपर्ने बताउनुभयो । विश्वमा ७ अरब नागरिक भन्दा फरक विशिष्टकृत बन्नुपर्ने उहाँले बताउनुभयो ।
