हेटौंडाः हेटौंडाको बुद्धचोकमा आज बिहान खुकुरी हानाहान भएको छ । हेटौंडा बसपार्क बस्ने २१ वर्षको सौरभ लामाले चौकिटोल बस्ने प्रशान्त नगरकोटीलाई खुकुरी प्रहार गरेका थिए । खुकुरी प्रहार गर्दा नगरकोटीको खुट्टामा चोट लागेको जिल्ला प्रहरी कार्यालय मकवानपुरका प्रहरी नायब उपरीक्षक जयश्वर रिमालले बताउनुभयो ।
नगरकोटीको अहिले अर्थपेडिक अस्पतालमा उपचार भइरहेको छ । त्यस्तै खुकुरी प्रहार गरेका सौरभ लामा पनि घाइते भएको र अहिले उनको हेटौंडा अस्पतालमा उपचार भइरहेको प्रहरी नायब उपरीक्षक रिमालले जानकारी दिनुभयो । उनीहरुबीच २ दिन अघि पनि झगडा भएको प्रहरीले जनाएको छ । सामान्य विवाद बढ्दै गएपछि खुकुरी प्रहार भएको थियो । प्रहरीले घटनाको थप छानबिन सुरु गरिसकेको प्रहरी नायब उपरीक्षक रिमालले बतानुभयो ।
