हेटौंडाः मकवानपुरको भीमफेदी गाउँपालिका–२, भैंसेस्थित प्रहरी चौकी भैंसेबाट खटिएको प्रहरीले लागूऔषधसहित २ जनालाई पक्राउ गरेको छ ।
हेटौंडाबाट काठमाडौंतर्फ जाँदै गरेको सुमोमा सुरक्षाजाँच गर्ने क्रममा मंगलबार दोलखा जिल्लाको भिमेश्वर नगरपालिका–३ का २० बर्षीय गौरवराज सेढाई र मकवानपुरको मनहरी गाउँपालिका–१ का राज मुक्तानलाई लागूऔषधसहित पक्राउ गरिएको जिल्ला प्रहरी कार्यालय मकवानपुरले जनाएको छ ।
मंगलबार दिउँसो ३ बजेर ५० मिनेटको समयमा हेटौंडाबाट काठमाडौं जाँदै गरेको प्रदेश नं. ०३–०–००१ ज ००३३ नम्बरको यात्रुबाहक सुमोको सुरक्षाजाँच गर्नेक्रममा दोलखाका गौरवराज सेढाईको साथबाट लागूऔषध नाईट्रोभेट २३३ ट्याब्लेट बरामद भएको प्रहरीले जनाएको छ । यस्तै मंगलबार नै साँझ साढे ६ बजेको समयमा हेटौंडाबाट काठमाडौंतर्फ जाँदै गरेको ना १ ज २५०७ नम्बरको यात्रुबाहक जीपमा सवार मनहरीका राज मुक्तानको साथबाट लागूऔषध डाईजेपाम ३५ एम्पुल, फेनारगन ३५ एम्पुल, नुर्फिन ३५ एम्पुल गरी जम्मा १०५ एम्पुल बरामद भएको प्रहरीले जनाएको छ ।
दुबैजनालाई हिरासतमा राखी आवश्यक अनुसन्धान गरिरहेको प्रहरीले जनाएको छ ।
