हेटौंडाः हात्तीको दारासहित हेटौंडा–१३ का ३५ बर्षीय सुवास तामाङलाई बारा प्रहरीले पक्राउ गरेको छ । बारा जिल्लाको अमलेखगन्जस्थित इलाका प्रहरी कार्यालयबाट खटिएको प्रहरी टोलीले हेटौंडाबाट बारातर्फ जाँदै गरेका सुवाससहित तीनजनालाई सोमबार साँझ साढे ६ बजेको समयमा पक्राउ गरिएको बारा प्रहरीले जनाएको छ ।
बारा जिल्लाको जितपुर–सिमरा उपमहानगरपालिका–२२ पूर्वपश्चिम राजमार्गअन्तर्गत २ नम्बर पुल नजिकबाट उनीहरुलाई पक्राउ गरेको हो । पक्राउ पर्नेमा बारा जिल्लाको निजगढ नगरपालिका–११, रतनपुरका ३४ बर्षीय सूर्यप्रसाद तामाङ र रतनपुरकै ३५ बर्षीय दिलबहादुर घलान छन् । उनीहरुको साथबाट ३ फिट ८ ईन्च लामो, १ फिट गोलाई भएको ८ किलो ४४० ग्रामको हात्तीको दारा बरामद भएको प्रहरीले जनाएको छ ।
ना ५० प १२२७ नम्बरको कालो रातो रङको २२० सिसिको पल्सर मोटरसाईकलमा सवार तीनैजनालाई रोकेर प्रहरीले सुरक्षाजाँच गर्ने क्रममा हात्तीको दारा बरामद गरेको हो । बरामद भएको हात्तीको दारा र मोटरसाइकलसहित तीनैजनालाई मंगलबार बारा प्रहरीले बारा जिल्लाको आधाभारस्थित पर्सा राष्ट्रिय निकुञ्जको कार्यालयमा बुझाइएको जनाएको छ ।
