हेटौंडाः कक्षा १२ को माध्यमिक शिक्षा उत्तीर्ण परीक्षाको समय तालिका सार्वजनिक भएको छ । राष्ट्रिय परीक्षा बोर्डले साउन ५ गते सूचना जारी गर्दैै कक्षा १२ को परीक्षा तालिका सार्वजनिक गरेको हो ।
आगामी साउन ३१ गतेबाट सुरु हुने परीक्षामा मकवानपुर जिल्लाबाट ५ हजार ३ सय ९१ जना परीक्षार्थी सहभागी हुने राष्ट्रिय परीक्षा बोर्डको हेटौंडा कार्यालय प्रमुख कृष्णप्रसाद घिमिरेले जानकारी दिनुभएको छ ।
कोरोना जोखिम कायम नै रहेको अवस्थामा विद्यार्थीको भौतिक उपस्थितिमै स्वास्थ्य सुरक्षाका मापदण्ड पालना गरी परीक्षा सञ्चालन गर्ने बोर्डले निर्णय गरेको छ । विद्यार्थी आफू अध्ययरत कलेज तथा विद्यालयलबाटै यसवर्ष कक्षा १२ को परीक्षामा सहभागी हुने भएका छन् ।
जिल्लाको सबैभन्दा बढी विद्यार्थी अध्ययन गर्ने मकवानपुर बहुमुखी क्यापसबाट यस वर्ष करिब १ हजार ३ सय विद्यार्थी कक्षा १२ को परीक्षामा सहभागी हुने मकवानपुर बहुमुखी क्याम्पस मानविकी संकाय प्रमुख संगम चौलागाईंले जानकारी दिनुभएको छ । यसैगरी हेटौंडा क्यापसबाट नियमिततर्फ ३ सय १३ जना परीक्षार्थी कक्षा १२ को परीक्षामा सहभागी हुने हेटौंडा क्यापसका क्याम्पस प्रमुख देवचन्द्र मानन्धरले जानकारी दिनुभयो ।
