हेटौंडाः बागमती प्रदेश सरकारले आज शुक्रबार यातायात क्षेत्रका विभिन्न कर तथा राजश्वको अनलाइन भुक्तानी सेवा शुभारम्भ गर्ने भएको छ । अनलाइन भुक्तानी सेवाको मुख्यमन्त्री डोरमणि पौडेलले आज शुक्रबार प्रदेश राजधानी हेटौडामा शुभारम्भ गर्ने कार्यक्रम रहेको छ ।
बागमती प्रदेशको भौतिक पूर्वाधार विकास मन्त्रालयले यतायातसँग सम्बन्धित विभिन्न प्रकारका कर तथा राजस्वहरु विद्युतीय माध्यमबाट भुक्तानी गर्न सकिने व्यवस्था गरेको छ । लाइसेन्स शुल्क, सवारी कर, ब्लुबुक नवीकरण शुल्क, जरिवानालगायतका राजस्व भुक्तानी अनलाइनबाटै गर्न सकिने व्यवस्था बागमती प्रदेश सरकारले गरेको हो ।
बागमती प्रदेशका भौतिक पूर्वाधार विकासमन्त्री रामेश्वर फुयाँलले यातायात सम्बद्ध सबै कर अब अनलाइनमा उपलब्ध इ–वालेट र बैंकिङ एपबाटै तिर्न सकिने बताउनुभयो । यसले ब्लुबुक नवीकरणलगायतका काम गर्न राजस्व तिर्न लाइनमा बस्नुपर्ने बाध्यता हटाउने उहाँले बताउनुभयो । महामारीमा भीड कम गर्न पनि यो सुविधाले सघाउ पुग्ने मन्त्री फुयाँलले विश्वास व्यक्त गर्नुभयो ।
‘सकेसम्म सेवा लिन कार्यालयमा आउन नपर्ने व्यवस्था गर्नुपर्छ भन्ने मान्यता हो । तर, कतिपय कागजी कामका लागि सेवाग्राही आउनुपर्ने त हुन्छ’, मन्त्री फुयाँलले भन्नुभयो– ‘पहिलो चरणमा भने राजस्व बुझाउन पनि लाइनमा बस्नुपर्ने बाध्यता हटाउन खोजेका छौं । थप सुविधाहरु पनि अनलाइनमा ल्याउँदै जान्छौं ।’
यो सेवा लिन नागरिक एपमा पनि ‘सवारी कर’ सेवा राखिएको छ । त्यस्तै वेबपोर्टलबाट पनि यो सेवा लिन सकिनेछ । प्रणालीबाटै तिर्न बाँकी करलगायतको जानकारी लिएर अनलाइनबाट राजस्व भुक्तानी गर्न सकिनेछ ।
