हेटौंडाः हेटौंडा अस्पतालस्थित पिसिआर ल्याबमा गरिएको परीक्षणमा बिहीबार २८ जनामा कोरोना संक्रमण पुष्टि भएको छ । हेटौंडा अस्पतालको कोभिड–१९ वार्डका इन्चार्ज डा. सागर काफ्लेका अनुसार ९२ जनाको स्वाब नमूना पिसिआर परीक्षण गर्दा २८ जनामा संक्रमण पुष्टि भएको हो ।
यसैबीच बिहीबार हेटौंडा–१० स्थित गोरक्षेश्वर स्वाब संकलन केन्द्रमा कोरोना संक्रमण भए नभएको परीक्षण गर्न १ सय ६० जनाको स्वाब संकलन गरिएको छ । यस्तै हेटौंडा अस्पतालमा उपचाररत १२ जनाको स्वाब पिसिआर परीक्षणका लागि संकलन गरिएको डा. काफ्लेले जानकारी दिनुभएको छ । हेटौंडा अस्पतालको कोभिड–१९ वार्डमा बिहीबार २५ जना उपचाररत छन् । ७ जना आइसियुमा र १८ जना एडियु वार्डमा उपचाररत छन् । पछिल्लो तीन दिन हेटौंडा अस्पतालको कोभिड–१९ वार्डमा मृत्यु शून्य छ ।
बिहीबार एचडियु वार्डबाट २ जना डिस्चार्ज भएका छन् भने २ जना नयाँ भर्ना भएका छन् । कोभिड–१९ संक्रमणका लक्षणहरु देखिए पनि समयमै स्वाब परीक्षण नगराई संक्रमण भई गम्भीर अवस्थामा परीक्षण गराएर उपचार गराउन आउँदा विरामीमा समस्या बढ्ने गरेको डा. काफ्लेको भनाइ छ । हेटौंडा अस्पतालको कोभिड–१९ वार्डमा अहिले दैनिक औसत १ सय १० सिलिण्डर अक्सिजन प्रयोग भइरहेको छ । दैनिक १५ सिलिण्डर अक्सिजन हेटौंडा अस्पतालमै रहेको प्लान्टबाट उत्पादन भइरहेको छ भने नपुग अक्सिजन बाहिरबाट खरिद गरिरहेको छ ।
उद्योग संघ मकवानपुरले स्थापना गर्ने भनिएको अक्सिजन प्लान्ट जडानको प्रक्रियामा छ । हेटौंडा अस्पतालमा अहिले ३ सय ५० सिलिण्डर अक्सिजन मौज्दात रहेको डा. काफ्लेले बताउनुभयो ।
