हेटौंडाः प्रहरीले मनहरीबाट हेटौडा आईरहेको ना.२ ख ५५७९ नम्बरको कन्टेनर गाडीमा लुकाएर ल्याएको गाँजा बरामद गरेको छ । मंगलबार हेटौंडा ११ थानाभर्याङ स्थित पुर्व पश्चिम लोकमार्ग सडक खण्डमा उक्त गाडिलाई रोक्न खोज्दा नरोकी फरार भएकोमा सो गाडिलाई पिछा गर्दै जाँदा वडा नम्बर १० भुटनदेवी मोड स्थित सडक खण्डमा फेला पारी रोकी चेकजाँच गर्दा उक्त कन्टेनर गाडीको केविन भित्र चालक बस्ने सिट पछाडी फल्स बटम बनाई लुकाई छिपाई ल्याएको १२ वटा पोकामा लागुऔषध गाँजा ९६ किलो ४०० ग्राम फेला परेको थियो ।
प्रहरीले गाडी चालक मनहरी गाउँपालिका–६ का २५ वर्षीय सन्तोष आले मगर, सह–चालक २१ वर्षीय मोसा घलान र सो कन्टेनरमा सवार कैलाश गाउँपालिका–८ भार्ता बस्ने २४ वर्षीय उमेश लामालाई गाँजा सहित पक्राउ गरेको छ । त्यस्तै लागुऔषध गाँजा कारोवारमा थप संलग्न चितवनको राप्ती नगरपालिका–२ का ३१ वर्षीय बिष्णु लामा र कैलाश गाउँपाकिला–८ बस्ने २९ वर्षको रोशन मुक्तानलाई प्रहरीले बुधबार पक्राउ गरेको जिल्ला प्रहरी कार्यालय मकवानपुरका प्रहरी प्रवक्ता जयश्वर रिमालले जानकारी दिनुभयो ।
