हेटौंडाः हेटौंडा–१४, बनेलधापस्थित बनेलधाप कालोपानी खानेपानी योजना हेटौंडा खानेपानी व्यवस्थापन बोर्डलाई हस्तान्तरण गरिएको छ । गत फागुनदेखि हस्तान्तरणको प्रक्रिया सुरु गरी बुधबार पूर्णरुपमा योजना हस्तान्तरण गरिएको हो ।
बनेलधाप कालोपानी खानेपानी तथा सरसफाई उपभोक्ता समितिका अध्यक्ष मोहन सिंह मोक्तानले वडा अध्यक्ष दीपक खड्काको उपस्थितिमा हेटौंडा उपमहानगरपालिकाका मेयर हरिबहादुर महतमार्फत बोर्डका अध्यक्ष प्रताप विष्टलाई कागजपत्र हस्तान्तरण गर्नुभएको हो ।
४ सय ५ घरपरिवार उपभोक्ता रहेको समिति बोर्डमा हस्तान्तरण हुने नगरक्षेत्रको पाँचौं उपभोक्ता समिति हो । नगरक्षेत्रका विभिन्न स्थानमा उपभोक्ता समितिले खानेपानी योजना सञ्चालनमा समस्या भोगिरहेका बेला उपमहानगरलाई नै हस्तान्तरण गर्ने गरिएको छ । हेटौंडा उपमहानगरपालिकाको स्वामित्वमा रहेको हेटौंडा खानेपानी व्यवस्थापन बोर्डमा उपलब्ध स्रोत, साधन, जनशक्ति तथा प्रविधिको प्रयोगबाट खानेपानी आयोजना सञ्चालन तथा व्यवस्थापन प्रभावकारी र सहज हुने गरेको छ ।
बनेलधाप कालोपानी खानेपानी योजना बोर्डमा गाभिएसँगै हेटौंडा खानेपानी व्यवस्थापन बोर्डको उपभोक्ताको संख्या १९ हजार ९ सय २ पुगेको हेटौंडा खानेपानी व्यवस्थापन बोर्डले जनाएको छ । बनेलधाप कालोपानी खानेपानी योजनाले एउटा डीप ट्युववेलबाट उत्पादन गरिएको पानी वितरण गरिरहेको छ । प्रमुख तथा शाखा गरी कुल २२ हजार मिटर पाइपलाइन रहेको बनेलधाप खानेपानी योजनाले बिहान र बेलुकी २ टाइम पानी वितरण गरिरहेको छ ।
बोर्डले जिम्मेवारी पाएपछि पानीको वितरण प्रणालीमा सुधार हुने दावी गरिएको छ । खानेपानी योजना हस्तान्तरण कार्यक्रममा हेटौंडा खानेपानी व्यवस्थापन बोर्डका सदस्य ईन्द्रप्रसाद नेपाल, बोर्डका निमित्त कार्यकारी निर्देशक सुदर्शन ढकालसहित प्रतिनिधिमूलक उपभोक्ताको उपस्थिति रहेको थियो ।
