हेटौंडाः मकवानपुरमा क्रियाशील लायन्स क्लबहरुले कोरोना भाइरस संक्रमित भई उपचार गर्नुपर्ने विरामीका लागि निशूल्क अक्सिजन सिलिण्डर वितरण गर्ने भएको छ ।
बुधबार मकवानपुरका लायन्स क्लबका पदाधिकारीको बैठक बसी अक्सिजन बैंक स्थापना गरी बिहीबारदेखि निशूल्क अक्सिजन सिलिण्डर वितरण गर्ने निर्णय गरेको हो । अक्सिजन बैंक स्थापना तथा सञ्चालनका लागि लायन्स क्लबका पदाधिकारी तथा सदस्यहरुबाट आर्थिक सहयोग संकलन गर्न सुरु गरिएको छ ।
जिल्ला कोभिड–१९, संकट व्यवस्थापन केन्द्रसँगको समन्वय तथा जिल्ला प्रहरी कार्यालय मकवानपुरसँगको सहकार्यमा लायन्स क्लब इन्टरनेशनल ३२५ बी २ अन्तर्गत एरिया २ ले निशूल्क अक्सिजन वितरण गर्न लागेको हो । लायन्स क्लब इन्टरनेशनल ३२५ बी २ की सचिव टासी डोल्मा तुम्बाहाङ्फेका अनुसार घरमै बसेर उपचार गराइरहेकाहरुलाई प्राथमिकतामा राखेर अक्सिजन सिलिण्डर वितरण गरिनेछ । आवश्यकताअनुसार अस्पताललाई समेत अक्सिजन सिलिण्डर वितरण गरिने तुम्बाहाङ्फेले बताउनुभएको छ ।
लायन्स क्लबले कोभिड–१९ संक्रमणको दोस्रो लहर देखिएसँगै कोभिड–१९ बाट बच्ने उपायबारे प्रचारात्मक सामग्री टाँस गर्ने, मास्क वितरण गर्ने, हात धुने स्टेशन मर्मत गर्ने काम गरिरहेको छ । गत वर्षको पहिलो चरणको कोभिड–१९ संक्रमणको लहरको समयमा लायन्सले सचेतना अभिवृद्धि गर्ने, हात धुने स्टेशन स्थापना गर्ने, लामो दूरीमा पैदल यात्रा गर्नेलाई खाजा वितरण गर्नेलगायतका कार्य गरेको थियो ।
