हेटौंडाः दलितसम्बन्धी अध्ययन, अनुसन्धान गर्दै आएको समता फाउन्डेशनले दलित सशक्तिकरण विधेयकको मस्यौदा बागमती प्रदेश सरकारलाई हस्तान्तरण गरेको छ ।
बुधबार समता फाउन्डेशसनका केन्द्रिय अध्यक्ष प्रदिप परियारले बागमती प्रदेशको मुख्यमन्त्री डोरमणि पौडललाई मस्यौदा हस्तान्तरण गरेका हुन् । मुख्यमन्त्री डोरमणि पौडेलले विधेयकको मस्यौदा ग्रहण गर्दै आवश्यकता अनुसार प्रदेश सरकारले त्यसलाई थपघट गरेर विधेयक संसदमा पेश गर्ने बताए । उनले सातौ अधिवेशनबाटै विधेयक पास गर्ने प्रतिवद्धता समेत व्यक्त गरे ।
यसअघि समता फाउन्डेशनको सक्रियतामा प्रदेश २ ले दलित सशक्तिकरण ऐन, २०७४ जारी गरिसकेको छ । सुदुरपश्चिम प्रदेशमा सोही विधेयक दर्ता भई ऐन जारी हुने प्रक्रियाम छ । कर्णाली प्रदेश र लुम्बिनीमा दलित सशक्तिकरण विधेयकबारे छलफल भई सामाजिक विकास मन्त्रलायलाई हस्तान्तरण गरिएको छ । यस्तै प्रदेश १ मा सरोकारवालाहरुसँग छलफल गरेर हस्तान्तरण गर्न बाँकि रहेकोे फाउन्डेशनको अध्यक्ष प्रदिप परियारले जानकारी दिए ।
