हेटौंडाः हेटौंडा–८, कमानेस्थित चन्द्रोदय माविमा शुक्रबार छात्रवृत्ति वितरण गरिएको छ । कक्षा १ देखि ८ सम्म अध्ययनरत छात्रा र दलित समुदायका विद्यार्थीलाई छात्रवृत्ति वितरण गरिएको विद्यालयका प्रधानाध्यापक जीधराज ढकालले जानकारी दिनुभएको छ ।
विद्यालय व्यवस्थापन समितिका अध्यक्ष कुलप्रसाद पौडेलको अध्यक्षता तथा वडा अध्यक्ष गोपालबहादुर श्रेष्ठको प्रमुख आतिथ्यमा छात्रवृत्ति वितरण गरिएको हो । विद्यालयले प्रतिविद्यार्थी चार सय रुपैयाँका दरले छात्रवृत्ति रकम हस्तान्तरण गरेको हो ।
विद्यालयले अभिभावकलाई नै बोलाएर छात्रवृत्ति वितरण गरेको हो । छात्रा छात्रवृत्ति र दलित छात्रवृत्तिका लागि दुई सय २० भन्दा बढी विद्यार्थी भए पनि शुक्रबार एक सय ३७ जनालाई छात्रवृत्ति वितरण गरिएको छ । शुक्रबार छुटेका विद्यार्थीलाई आइतबारदेखि वितरण गरिने प्रधानाध्यापक ढकालले बताउनुभएको छ । छात्रवृत्ति वितरणका लागि विद्यालयमा ९६ हजार रुपैयाँ प्राप्त भएको छ ।
