हेटौंडाः नुवाकोट जिल्लामा जारी बागमती प्रदेश लिग फुटबल प्रतियोगितामा मकवानपुर जिल्लाको लिग विजेता डाँफे युवा क्लब सेमीफाइनलमा प्रवेश गरेको छ । मंगलबार भएको समूह चरणको अन्तिम खेलमा काठमाडौं जिल्ला लिग विजेता वाइल्ड स्पोर्टस् एक्सपोर्टसँग बराबरी खेलेसँगै मकवानपुरको डाँफे युवा क्लब समूह विजेता बन्दै सेमीफाइनलमा प्रवेश गरेको हो ।
समूह चरणको पहिलो खेलमा काभ्रे जिल्लाको लिग विजेता आकाश भैरव क्लबलाई ३–१ गोलअन्तरले पराजित गरेको डाँफे ४ अंकसहित समूहको शीर्षस्थानमा रहँदै सेमीफाइनल प्रवेश गरेको हो । समान ४ अंक भए पनि गोलअन्तरका आधारमा वाइल्ड स्पोर्टस् समूह उपविजेता बनेको छ । काठमाडौंको वाइल्ड स्पोर्टस्ले आकाश भैरवलाई २–० गोलअन्तरले पराजित गरेको थियो । समूह चरणका दुबै खेलमा पराजित भएको आकाश भैरव अंकविहिन हुँदै प्रतियोगिता टुंग्याएको छ ।
