हेटौंडाः धरान–चतरा–हेटौंडा राजमार्गअन्तर्गत मकवानपुरको बागमती गाउँपालिका–४, हरामीचोकमा शनिबार साँझ मोटरसाइकल दुर्घटना हुँदा एकजनाको मृत्यु भएको छ । मोटरसाइकल अनियन्त्रित भई दुर्घटना हुँदा मोटरसाइकलमा पछाडि बसेर यात्रा गरिरहेका हेटौंडा–६, रामनगरका ३० वर्षीय आशिष श्रेष्ठको मृत्यु भएको प्रहरीले जनाएको छ ।
दुर्घटनामा गम्भीर घाइते भएका आशिषको स्थानीय स्वास्थ्य चौकीमा प्राथमिक उपचार गरी हेटौंडा अस्पताल ल्याइएको थियो । हेटौंडा अस्पतालमा साँझ ७ बजेको समयमा चिकित्सकले आशिषलाई मृत घोषित गरिदिएको प्रहरीले जनाएको छ । दुर्घटनामा परी मोटरसाइकल चालक हेटौंडा–६, रामनगरका २४ वर्षीय दिनेश दाहाल घाइते भएका छन् । प्रदेश नम्बर ३–०३–००१ प ८८९७ नम्बरको मोटरसाइकल दुर्घटना भएको हो ।
