हेटौंडाः पूर्वपश्चिम राजमार्गअन्तर्गत हेटौंडा–११, नवलपुरमा बस र मोटरसाइकल दुर्घटना भएको छ । आइतबार दिउँसो भएको दुर्घटनामा तीनजना घाइते भएको जिल्ला प्रहरी कार्यालय मकवानपुरले जनाएको छ । घाइते मध्ये एकजनाको हेटौंडा–११ स्थित चुरेहिल हस्पिटलमा उपचार भइरहेको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक ईन्द्रबहादुर रानाले जानकारी दिनुभएको छ ।
दुर्घटनामा घाइते दुईजना उपचारका लागि कता लगियो भन्ने विवरण प्राप्त भइनसकेको र प्रहरीले बुझ्ने कार्य गरिरहेको प्रहरी नायव उपरीक्षक रानाले बताउनुभएको छ । नारायणगढबाट हेटौंडातर्फ आउँदै गरेको ना ६ ख ५८४० नम्बरको बसले ओभरटेक गर्ने क्रममा हेटौंडाबाट नारायणगढतर्फ जाँदै गरेको मोटरसाइकललाई ठक्कर दिएको हो । प्रहरीले घटनाबारे अनुसन्धान थालेको छ ।
