हेटौंडाः हेटौंडा उपमहानगरपालिका वडा नम्बर १३ स्थित रमन्थलीमा रहेको पुरानो फुटबल मैदानको हेटौंडा उपनगरपालिकाका मेयर हरिबहादुर महत सहित जिल्ला खेलकुद विकास समितिका अध्यक्ष सानु लामाले स्थलगत अवलोकन गरेका छन् ।
मेयर महतले खेलकुद मैदानको अवलोकन गर्दै तत्कालको लागि रमन्थली पुरानो फुटबल मैदानलाई व्यवस्थित हिसाबले निर्माण गर्ने र साथमा सुन्दर पार्क सहित खुल्ला जिम क्लबको निर्माण गर्ने प्रतिबद्धता व्यक्त गर्नु भएको हो । अवलोकनका क्रममा युवा क्लब, स्थानीय बासिन्दाहरुसँग त्यहाँको समस्याहरुको बारेमा समेत मेयर महतले जानकारी लिनुभएको छ । मेयर महतले मुख्य बाटोसँग जोड्ने १ सय ५० मिटर बाटोको स्याल्ब ढलान गर्ने प्रतिबद्धता गर्नुभएको छ ।
