हेटौंडाः मकवानपुरको उत्तरी क्षेत्र कैलाश गाउँपालिका–१० मा एकीकृत बस्ती निर्माणको कार्य अगाडि बढेको छ । गाउँपालिकामा जोखिम अवस्थामा बसोबास गर्दै आएका १० घरधुरीको लागि एकीकृत बस्ती निर्माण हुन लागेको कैलाश गाउँपालिका वडा नम्बर १० का वडा अध्यक्ष माणिकलाल मोक्तानले जानकारी दिनुभयो ।
एकीकृत बस्ती निर्माणका लागि ३ महिनाअघि १० घरधुरी लाभग्राहीको नाममा जग्गा पास गरिएको उहाँले बताउनुभयो । एकीकृत बस्तीको लागि कैलाश गाउँपालिका–१०, बलमटारमा सात–सात धुर जमिन खरिद गरी लाभग्राहीको नाममा पास गरिएकोे छ ।
चालु आर्थिक वर्षमा भूकम्प पुननिर्माण प्राधिकरणले उनीहरुलाई घर बनाउन प्रतिघरधुरी ३ लाख रुपैयाँ उपलब्ध गराउने भएको छ । यसअघि उनीहरुलाई जग्गा किन्न २ लाख रुपैयाँ उपलब्ध गराएको र नपुग रकम लाभग्राही आफैंले थपेको वडाअध्यक्ष मोक्तानले जानकारी दिनुभयो ।
यस्तै भूकम्प पुननिर्माण प्राधिकरण जिल्ला कार्यान्वयन इकाई भवन शाखाले एकीकृत बस्तीको प्राविधिक कार्य गर्ने भएको छ । भवन कार्यालय मकवानपुरबाट एकीकृत बस्तीको प्राविधिक सहयोग, खानेपानी, पर्खाललगायतका काममा ४० लाख रुपैयाँसम्मको काम हुने भवन कार्यालय मकवानपुरका इन्जिनियर रवीन पाठकले बताउनुभयो ।
आइतबार भवन कार्यालयका इन्जिनियरसहितको टोलीले एकीकृत बस्ती निर्माण हुने स्थानको स्थलगत अवलोकन गरेको वडा अध्यक्ष मोक्तानले बताउनुभयो । चालु आर्थिक वर्षसम्म एकीकृत बस्ती निर्माण कार्य सम्पन्न गर्ने योजना रहेको उहाँले जानकारी दिनुभयो ।
