हेटौंडाः हेटौंडा उपमहानगरपालिका भित्र रहेका मेलमिलाप केन्द्रहरुमा आएको विवादहरु टुङ्गो नलागेमा अब अदालत पठाइने भएको छ । यसअघि मेलमिलाप केन्द्रमा सहमति हुन नसकेका विवादहरु हेटौंडा उपमहानगरपालिकाको न्यायिक समितिमा पठाउने गरिएको थियो । अब भने मेलमिलाप केन्द्रमा टुङ्गो नलागेका विवादहरु न्यायिक समितिमा नभएर अदालतमा पठाइने भएको हेटौंडा उपमहानगरपालिकाको मेलमिलाप संयोजक रामचन्द्र अर्यालले बताउनुभयो ।
हेटौंडा उपमहानगरपालिकाको मेलमिलाप केन्द्रहरुमा अधिकांश विवादहरु जग्गा विवाद, सिमा साँध र अशंबण्डाका विवादहरु आउने गरेकोे मेलमिलाप केन्द्रका संयोजकहरुले बताउनुभयो । चालु आर्थिक वर्षको साउन, भदौ र असोज महिनामा २० वटा विवादहरु हेटौंडा उपमहानगरपालिकाको कार्यालयमा स्थापित मेलमिलाप केन्द्रमा दर्ता भएको संयोजक रामचन्द्र अर्यालले बताउनुभयो ।
हेटौंडा उपमहानगरपालिकाको भवनमा रहेको मेलमिलाप केन्द्रले हेटौंडा–१ देखि हेटौंडा–११ नम्बर वडाका विवादहरुको विषयमा मेलमिलाप गराउने गरेको छ । हेटौंडा–३ बाहेक हेटौंडा १ देखि ११ नम्बर सम्मका १० वडाका विवादहरु मेलमिलाप केन्द्रमा आउने गरेको संयोजक अर्यालको भनाइ छ । अधिकांश विवादका विषयहरु घरजग्गाको विवाद, सिमासाँधको तथा अशंबण्डाको आउने गरेको उहाँले बताउनुभयो । चालु वर्षको ३ महिनामा दर्ता भएका २० विवाद मध्ये ७ वटा विवादका विषयहरु अन्तिम प्रक्रियामा पुगेको छ ।
गत वर्ष ६० वटा निवेदन परेकोमा ३६ वटा विवाद मिलाइएको उहाँले बताउनुभयो । हेटौंडा उपमहानगरपालिकाको भवनमा रहेको मेलमिलाप केन्द्रमा सबैभन्दा बढी हेटौंडा–५ बाट विवादहरु दर्ता भएको तथा ११ नम्बर वडाबाट फाट्टफुट्ट विवाद आउने गरेको पाइएको मेलमिलाप संयोजक अर्यालले बताउनुभयो । हालसम्म मेलमिलापका लागि आएका मध्ये करिब ८० प्रतिशत मेलमिलाप गराइएको तथा २० प्रतिशत भने विवाद मिलाउन नसकिएको उहाँले बताउनुभयो । हेटौंडा उपमहानगरपालिकामा ५ वटा मेलमिलाप केन्द्र तोकिएको छ ।
हेटौंडा उपमहानगरपालिकाको ३ नम्बर वडा बाहेक १ देखि ११ नम्बर सम्मका १० वटा वडाको मेलमिलाप केन्द्र हेटौंडा उपमहानगरपालिकाको कार्यालयबाटै हुँदै आएको छ । त्यस्तै ३ नम्बर वडाका लागि ३ नम्बर वडा कार्यालयमा, १९ नम्बर वडाका लागि १९ नम्बर वडा कार्यालयमा, १३ नम्बर वडा कार्यालय भवनमा हेटौंडा १२ र १३ नम्बर दुई वडाका लागि मेलमिलाप केन्द्र तोकिएको छ । यसैगरी हेटौंडा १४ र १५ नम्बर वडाका लागि हेटौंडा १५ को वडा कार्यालयमा, हेटौंडा १६ र १७ नम्बर वडाका लागि १७ नम्बर वडा कार्यालय हटियामा तथा १८ नम्बर वडाका लागि १८ नम्बर वडा कार्यालय हर्नामाडिमा मेलमिलाप केन्द्र रहेको छ ।
हेटौंडा–१९ मा रहेको मेलमिलाप केन्द्रका मेलमिलाप संयोजक कृष्णप्रसाद पौडेलका अनुसार चालु वर्षको साउन, भदौ र असोजसम्म १४ वटा निवदेन दर्ता भएका छन् । जसमध्ये ३ वटा विवादमा मेलमिलाप भइसकेको छ भने अन्य प्रक्रियामा रहेको छ । गत वर्षमा २४ वटा विवादमा मेलमिलाप गराइएको उहाँले बताउनुभयो । यस्तै गत वर्षमा हेटौंडा–१९ को मेलमिलाप केन्द्रमा आएको ११ विवाद मेलमिलाप हुन नसकेर चालु वर्षमा सरेको संयोजक पौडेलले बताउनुभयो । हेटौंडा–१३ का मेलमिलाप केन्द्रका संयोजक लक्ष्मीमाया मोक्तानले चालु वर्षको साउन, भदौ र असोजसम्म १० वटा विवादहरु मेलमिलाप गर्न केन्द्रमा आएको बताउनुभयो । जसमध्ये ३ वटा विवादमा मेलमिलाप भएको र बाँकी ७ वटा प्रक्रियामा रहेको उहाँले जानकारी दिनुभयो ।
यसैगरी हेटौंडा १६ र १७ नम्बर वडाका लागि हेटौंडा १७ को वडा कार्यालयमा मेलमिलाप केन्द्र तोकिएको छ । सरस्वती पौडेलको संयोजकत्वमा रहेको मेलमिलाप केन्द्रमा चालु वर्षको असोजसम्म ५ वटा निवेदन दर्ता भएका छन् । दर्ता भएका विवादमा हालसम्म छलफल हुन नसकेको उहाँले बताउनुभयो । यस्तै गत वर्षमा भने २६ विवाद मेलमिलाप गराउन सकिएको मेलमिलाप केन्द्रकी संयोजक सरस्वती पौडेलले बताउनुभयो । हेटौंडा–१८ मा रहेको मेलमिलाप केन्द्रमा ७ वटा विवादहरु चालुवर्षको असोज महिनासम्म दर्ता भएको छ । जसमध्ये ४ वटा विवादमा सहमति भइसकेको छ भने ३ वटा प्रक्रियामा रहेको मेलमिलाप केन्द्रकी संयोजक निर्मला न्यौपाने बानियाँले जानकारी दिनुभयो ।
