हेटौंडाः मकवानपुरमा दशैंलक्षित सुरक्षाका योजना लागू भएको प्रहरीले जनाएको छ । जिल्ला प्रहरी कार्यालय मकवानपुरले दशैंमा पनि यात्रु सहायता कक्ष सञ्चालन गर्ने प्रहरी नायव उपरीक्षक ईन्द्रबहादुर रानाले बताउनुभयो । छिट्टै यात्रु सहायता कक्ष निर्माण गरिने भएको उहाँले बताउनुभयो ।
यात्रुहरुको भीडभाड धेरै हुने स्थानहरुमा यस्तो सेवा सुचारु गरिने प्रहरी नायव उपरीक्षक रानाको भनाइ छ ।जिल्ला प्रहरी कार्यालय मकवानपुरले गत वर्षहरुमा पनि हेटौंडाको बसपार्क लगायत धेरै भीडभाड हुने स्थानहरुमा सहायता कक्ष (हेल्प डेस्क) स्थापना गर्दै आएको थियो । चाडवाडमा सादा पोशाकमा भने प्रहरी नखटाइने भएको छ । अहिले प्रहरीले प्रहरी पोशाक, साइकल सुरक्षा, मोटरसाइकबाट नागरिकहरुलाई सुरक्षा दिइरहेको छ । जिल्लामा चाडवाडको समयमा प्रहरीले सवारी साधन र मापसे चेकिङ पनि गर्ने भएको छ । कोरोना महामारीको अवस्थामा सुरक्षित रहेर सुरक्षा दिने भएको प्रहरी प्रवक्ता समेत रहनुभएका रानाले बताउनुभयो ।
कोरोना महामारी तीव्र फैलँदा प्रहरीमै सङ्क्रमण फैलिएको छ । हालसम्म जिल्ला प्रहरी कार्यालय मातहतका सबै कार्यालयहरुमा कार्यरत ३५ जना प्रहरीमा कोरोना पुष्टि भएको छ । २ जना बाहेक अन्य सबै निको भएका छन् । प्रहरीले सबै जनशक्तिलाई बाहिर नखटाउने भएको छ । आवश्यकताअनुसार जिल्ला प्रहरी कार्यालयले व्याकअप फोर्स तयार गरेर राख्ने गरेको उहाँले बताउनुभयो । यस्तै चाडवाडमा प्रहरीले आफ्नो घर वरपर शंकास्पद व्यक्ति देखिएमा वा कुनै पनि प्रकारको घटना भएमा प्रहरीलाई जानकारी गराउन आग्रह गरेको छ । दसैंमा चोरीका घटनाहरु हुन सक्ने भन्दै चनाखो बस्न पनि जिल्ला प्रहरी कार्यालय मकवानपुरले भनेको छ ।
