हेटौंडाः बागमती प्रदेश सरकारको गौरबको आयोजना पोष्टबहादुर बोगटी (भीमफेदी–कुलेखानी) सुरुङमार्ग आयोजनाको कार्यालय हेटौंडामा स्थापना गरिएको छ । कार्यालयको आज प्रदेशको भौतिक पूर्वाधार विकास मन्त्री रामेश्वर फुँयालले उद्घाटन गर्नुभएको हो ।
कार्यालयको उद्घाटन गर्नुहुँदै मन्त्री फुँयालले प्रदेश गौरवको आयोजनाको रुपमा रहेको सुरुङ्गमार्गलाई तोकिएको समयमै सक्ने बताउनुभयो । १८ अर्ब ७ करोड अनुमान गरीएको सुरुङ मार्ग निर्माण पछि प्रदेश मात्र नभई राष्ट्रले नै गर्ब गर्न लायकको हुने उहाँले बताउनुभयो । सुरुङमार्ग निर्माणले दीर्घकालीनरुपमा देशलाई फाइदा पुर्याउने भन्दै यसको निर्माणमा सरकारको कुनै पनि कमजोरी नहुने बिश्वास दिलाउनुभयो । यसैगरी सुरुङ मार्ग निर्माण हुने स्थानसम्म पुग्न र काठमाण्डौ जान हाल प्रयोग भइरहेको भैसेदेखि भीमफेदीसम्मको सडक स्तरीकरण गर्ने कार्य प्रारम्भ भइसकेको पनि जानकारी गराउनुभयो । सुरुङ निर्माणको कामले गति लिन सुरु गरेको बताउँदै जनताले प्रत्यक्ष अनुभूत गर्ने अवस्थामा प्रदेश सरकार पुग्न थालेको पनि जनाउनुभयो ।
देशको समग्र अर्थतन्त्रमा सकारात्मक प्रभाव पार्ने यो आयोजना निर्माणमा सहकार्य गर्न संघीय सरकारले कार्यदल यसअघि नै गठन गरेको छ । भैतिक पूर्वाधार तथा यातायात मन्त्रालयले गठन गरेको कार्यदलले प्राविधिक, आर्थिक र कानूनी पक्षको अध्ययन गरी प्रतिवेदन पेस गर्ने छ । दुई वटा सुरुङ जोड्ने एप्रोच सडक सहित तीनवटा पुलसहित निर्माण गरिने जनाइएको छ । सुरुङमार्गको विस्तृत अध्ययन प्रतिवेदन अनुसार ३ दशमलव २१ किलोमिटर लामो र १५ र ७ मिटर फराकिलो दुर्ई वटा सुरुङ निर्माण गरिने छ । प्रदेश सरकारले पोष्टबहादुर बोगटी भीमफेदी–कुलेखानी सुरुङमार्ग नामकरण गरेर यसको निर्माणको तयारी थालेको २ वर्ष भइसकेको छ । प्रदेश सरकारले वैशाखमा टेण्डर आह्वान गर्ने योजना बनाए पनि कोरोना प्रभावका कारण समयमै टेण्डर आह्वान गर्न सकेको छैन ।
निजीक्षेत्रको नेपाल पूर्वाधार विकास कम्पनीले हेटौँडा–भीमफेदी–कुलेखानी–काठमाडौं सुरुङमार्ग बनाउन संघीय सरकारसँग लिएको अनुमति खारेज गर्न बागमती सरकारले पहिले नै पत्राचार गरिसकेको छ । दुई लेनको सुरुङमार्ग भित्र एकातर्फ ग्यास र अर्कोतर्फबाट तेल लैजान पाइपलाइनसमेत राख्ने ठाउँ छुट्याइने मन्त्रालयले जनाएको छ । सुरुङमार्ग निर्माण हुँदा हेटौँडा–काठमाडौंको यात्रा करिब २ घण्टामा गर्न सकिनेछ । पोस्टबहादुर बोगटी सुरुङमार्ग (भीमफेदी–कुलेखानी) सुरुङ निर्माण गर्न १२ वटा अन्तर्राष्ट्रिय परामर्शदाताले आशयपत्र दर्ता गराएका छन । प्रदेशको भौतिक पूर्वाधार विकास मन्त्रालयले सुरुङमार्गको परामर्शदाता छनोटका लागि भदौ १ मा अन्तर्राष्ट्रिय बोलपत्र आह्वान गरेको थियो । विभिन्न मुलुकका १२ वटा कम्पनीले परामर्शदाताका निम्ति आशयपत्र दर्ता गराएको मन्त्रालयले जनाएको छ ।
