विवेकशील नेपाली दल मकवानपुरले केही दिनअघि मात्रै भर्चुअल माध्यमबाट जिल्ला सम्मेलनको आयोजना गरेर जिल्ला तदर्थ समिति गठन गरेको छ । २०७४ सालको निर्वाचनमा निक्कै चर्चामा रहेको विवेकशील साझा दल निर्वाचनमा सुखद् परिणाम हासिल गर्न नसके पनि सम्मानजनक मतको हकदार बनेको थियो । तर, निर्वाचनअघि विवेकशील नेपाली दल र साझा पार्टी बीच एकीकरण भएर बनेको विवेकशील साझा पार्टी निर्वाचन सकिएको केही समयमै फेरि फुटको स्थितिमा पुगेको थियो । पार्टी फुटेको निक्कै समयपछि मकवानपुर जिल्लामा विवेकशील नेपाली दलले तदर्थ समिति गठन गरेको छ । विवेकशील नेपाली दल मकवानपुरको तदर्थ समितिको अध्यक्षमा निर्वाचित हुनुभएका सुमन आचार्यसँग समाज सम्पादक सुरेश श्रेष्ठले गर्नुभएको कुराकानीः
समाजः विवेकशील नेपाली दलको अहिलेको मुख्य एजेण्डा के हो ?
आचार्यः वैकल्पिक राजनीतिलाई मूलधारमा स्थापित गर्ने नै मुख्य एजेण्डा हो । अब कुनै पनि दलले आफूलाई प्रष्ट गर्न नसकिरहेको अवस्थामा विवेकशील नेपाली दलले हामी वैकल्पिक शक्तिको प्रतिनिधित्व गर्न सक्छौं । अब आउने दलहरुमा पुराना दलहरुलाई विस्थापित गर्न विवेकशील नेपाली दल जस्तो हुनुपर्छ र अबको वैकल्पिक शक्ति भनेको नै विवेकशील नेपाली दल हो भनेर प्रष्ट गर्न यो दल अहिले लागीपरेको छ ।
समाजः वैकल्पिक शक्तिको कुरा गर्नुभयो । गएको निर्वाचनपछि विवेकशील पार्टी फुट भयो कहिँ कतै देखिएन त्यसपछि । अहिले तदर्थ समिति बनेको छ । के जनताले अब विश्वास गर्न सक्छन् त ?
आचार्यः राजनीतिक दल पनि परिपक्क हुन अन्य प्राणीजस्तै केही समय लाग्छ नै । वैकल्पिक राजनीतिको हामीले रहर त गर्यौं । तर राजनीतिमा केही दाउपेच हुँदारहेछन् । राजनीतिमा पनि सिक्नुपर्ने कुरा थुप्रै हुनेरहेछ । यो वैकल्पिक राजनीतिको हुटहुटी हाम्रो मनमा त थियो नै तर त्यसको लागि पर्याप्त आधार भने हामीले विकास गरिसकेका थिएनौं । यसकारण हामी त्यो बेला विवेकशील साझासँग मिलेका थियौं । मिलेर जान पाएको भए अझै राम्रो थियो । वैकल्पिक शक्ति बन्ने परिपक्कको आधार त्यो बेला बनिसकेको थिएन ।
समाजः के जनताले विवेकशील नेपाली दल वा साझा दुबैलाई वैकल्पिक शक्तिको रुपमा हेर्ने आधार छैन या त्यो परिपक्वता अझै बनिसकेको छैन ।
आचार्यः यस्तो विलकुल होइन । समयसँगै सिक्दै जाने कुरामा हामीले पनि थुप्रै चोट, हण्डरहरु खायौं । यो फुटपछि एउटा नकारात्मक सन्देश पनि गयो । हामीले गाली पनि पायौं विभिन्न सञ्चारमाध्यम, सामाजिक सञ्जालहरुबाट । हामीलाई विश्वास गरेर मत दिनुभएकाहरुबाट हामीले गाली पनि खायौं । यो एक किसिमले हामीले गल्ति पनि गरेका हौं । यसकारण हामीले धेरै कुरा सिक्यौं पनि । सिकेर हामीले अझ पार्टीलाई सुधार गर्दै पनि लगेका छौं । यही बीचमा विवेकशील नेपाली दलले आफ्नो नीतिहरु पनि प्रष्ट रुपमा कोरेको छ । यो पहिलो पटक नीति सम्मलेन गरेर सार्वजनिक भएको छ । नेपालको सन्दर्भमा आजसम्म कुनै पनि दलले यस्तो नीतिको लागि सम्मेलन गरेको सुनेको पनि छैन । इतिहासमा पनि छैन । यो पहिलोपटक भएको छ । आफ्नो विचारमा प्रष्टता ल्याउँदै हामी वैकल्पिक मात्र भनेर पनि भएन वैकल्पिक पनि कुन धारमा हिँड्छ त । यसले समाजको कुन पक्षलाई प्रतिनिधित्व गर्दछ । भोलि सत्तामा आए भने समाजको मोडल कस्तो बनाउँछ भन्नेमा हामी अस्पष्ट थियौं भने त्यसलाई हाम्रो नीति सम्मेलनले स्पष्ट पारेको छ ।
समाजः नेपाली जनताले विवेकशील दल सुध्रँदै छ, परिपक्क हुँदैछ भनेर कसरी विश्वास गर्ने त अब ?
आचार्यः यसका लागि हेनुपर्ने आधार भनेको त एउटा हाम्रो विधान पनि हो । विधानमा पनि भिन्नता छन् । अर्को कुरा भनेको त हाम्रो गतिविधि नै हो । पार्टीमा सम्बद्ध व्यक्तिहरुको आचारण, उहाँहरुले गर्ने क्रियाकलाप, उहाँहरुले गर्ने सामाजिक अभियान, सामाजिक विषयवस्तुमा उहाँहरुको धारणा, यस्तै विषयहरु नै हुन हामीलाई एक पटक मौका दिने या नदिने भन्ने ।
समाजः विवेकशील नेपाली दलमा आबद्ध नेता कार्यकर्ताहरुको संख्या कति छन् जुन जनताले तपाईहरुलाई मूल्याङ्कन गर्न सकोस् ?
आचार्यः हामी क्रमशः विस्तार हुँदैछौं । बढ्ने क्रममै छौं । सानो टिम छ तर धेरै सानो पनि होइन । टुट्ने फुट्नेले गर्दा पनि कम भयो । सानो टिम भएपछि थुप्रै काममा व्यस्त भइयो । पर्याप्त कार्यकर्ता चै अझै पनि छैन ।
समाजः विवेकशील नेपाली दलको अबको रणनीति र कार्यहरु के–के हुनेछन् ?
आचार्यः उम्मेदवारी दिनुमात्र आफैंमा पर्याप्त हुँदैन । हाम्रा उम्मेदवारीका आधारहरु के हुन त । किन हामीलाई भोट हाल्ने त जनताले भन्नका लागि हाम्रा अभियानहरु पनि सँगसँगै लैजाँदै गर्ने । हाम्रा अभियानहरु चाहीँ देखाउनका लागि मात्रै नभएर बरु थोरै गर्ने एउटा क्षेत्रमा मात्रै गर्ने परिणाम दिर्ने प्रकृत्तिको गर्ने । न कि विज्ञापन टाइपको ।
समाजः मकवानपुर जिल्लाको निर्वाचित अध्यक्ष रहनुभएको छ । विवेकशील नेपाली दलले स्थानीय सरकारको गतिविधिहरुलाई कसरी हेरिरहेको छ ?
आचार्यः स्थानीय सरकारको गतिविधी पनि परम्परागत भन्दा खासै फरक हुन सकेको छैन । विकास निर्माणका काममा बढी केन्द्रित छ । वर्षभरि काम नगर्ने असार लाग्नलागेपछि सबैमा हात हाल्ने । मुख्य काम विकासमा तर पर्याप्त रुपले सही समयमा काम सकिन सकेको छैन ।
समाजः स्थानीय सरकारको निगरानी गर्ने संयन्त्र पार्टीमा निर्माण भएको छ कि छैन ?
आचार्यः हामीले नगरपालिकाको गतिविधि नियाल्नका लागि सूचनाको हक सम्बन्धी निवेदन दिएका थियौं । हामीले फलोअप गरिरहँदा पनि त्यति सूचना चै दिनुभएन । यसका लागि अगाडि हामीले प्रक्रिया बढाउन सकेनौं । प्रचारात्मक नभएर परिणाममुखी भएर काम गर्ने हाम्रो पार्टी हो । सबैतिर हात हाल्ने पुराना दलले जस्तो गएर ज्ञापनपत्र बुझाएर फोटो खिचाएर पत्रिकामा दिने तर परिणाममा चै हाम्रो जिम्मेवारी सकियो भनेर पन्छिने यस्तो खालको गतिविध गर्ने हाम्रो रहर छैन ।
