हेटौंडाः पूर्वपश्चिम राजमार्गअन्तर्गत हेटौंडा–११, नवलपुरमा माइक्रो बस र ट्याक्टर ठोक्किएर दुर्घटना भएको छ । नवलपुरबाट हेटौंडातर्फ आउँदै गरेको ना ५ त ७७०० नम्बरको ट्याक्टरलाई सोही दिशामा गुडिरहेको ना १ ज ८६८५ नम्बरको माइक्रो बसले बिहान सवा ९ बजे ठक्कर दिँदा दुर्घटना भएको स्थानीयले बताएका छन् । दुर्घटनामा परी घाइते भएकाहरुलाई उपचारका लागि अस्पताल पठाइएको स्थानीय देवकुमार श्रेष्ठले जानकारी दिनुभएको छ ।
जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक ईन्द्रबहादुर रानाका अनुसार दुर्घटनामा परी ट्याक्टर चालक हेटौंडा–११ का २१ वर्षीय गणेश गिरी, सहचालक २६ वर्षीय साकेश प्रजा, माइक्रोमा सवार पर्सा जिल्लाको वीरगन्ज महानगरपालिका–९ का ५५ वर्षीय दयासागर प्रसाद, मकवानपुर जिल्लाको बागमती गाउँपालिका–३ का २६ वर्षीय कृष्णबहादुर थिङ, हेटौंडा–४ की ५० वर्षीया गीता सुवेदी, लमजुङ जिल्लाको राइनो नगरपालिका–४ का ३५ वर्षीय राजेन्द्र गुरुङ, राजेन्द्रकी श्रीमति २१ वर्षीया रिना गुरुङ र उनीहरुकी छोरी २७ महिनाकी क्रिष्टिन गुरुङ र मनहरी गाउँपालिका–८ का ४९ वर्षीय राजकुमार स्याङ्तान घाइते भएका छन् । उनीहरुको हेटौंडा–११, थानाभर्याङस्थित चुरेहिल हस्पिटलमा उपचार भइरहेको प्रहरीले जनाएको छ ।
