हेटौंडाः मकवानपुरको भीमफेदी कारागारबाट फरार भएका कैदीलाई मकवानपुर प्रहरीले पक्राउ गरेको छ । कारागारबाट फरार सुनसरी जिल्लाको रामधुनी नगरपालिका–७ का २५ वर्षीय कुलदीपराज धामीलाई शुक्रबार नवलपरासी जिल्लाको देवचुली नगरपालिका–१६, रजहरबाट पक्राउ गरिएको छ । मकवानपुर प्रहरीले आज पत्रकार सम्मेलन गरेर धामीलाई सार्वजनिक गरेको छ ।
२०७१ सालमा चितवन जिल्लाका रोजिन गुरुङको हत्यामा संलग्न भएको भनी दोषी ठहर भई जन्मकैद सजाय पाएर कैदी जीवन बिताइरहेका धामी २०७६ साल कात्तिक ३० गते कारागारबाट फरार भएका थिए । कञ्चनपुरबाट चितवनतर्फ आउँदै गरेको भन्ने सूचनाका आधारमा प्रहरीले नवलपरासीबाट धामीलाई पक्राउ गरेको जिल्ला प्रहरी कार्यालय मकवानपुरका प्रमुख प्रहरी उपरीक्षक सुशील सिंह राठौरले जानकारी दिनुभयो । धामीलाई आजै भीमफेदी कारागार पठाइने प्रहरी उपरीक्षक राठौरले बताउनुभयो । कैदजीवन बाँकी नै रहँदा फरार हुँदा पक्राउ परेपछि बाँकी कैदको डेढ गुणा बढी कैद सजाय भोग्नुपर्ने प्रहरी उपरीक्षक राठौरले बताउनुभयो ।
