हेटौँडा : हेटौँडा–१ स्थित जंगे सेकुवाले २५० रुपैयाँमै मटन खाना खुवाउने भएको छ । भोलि बुधबारदेखि उपभोक्तालाई सहुलियत दरमा मटन खाना खुवाउन लागिएको जंगे सेकुवाका सञ्चालक जंग बहादुर बस्नेतले जानकारी दिनुभयो । बढी भन्दा बढी सेवाग्राहीलाई सेवा दिने र मूल्यमा सहुलियत कायम गर्ने उद्देश्यले मटन खाना खुवाउन लागिएको बस्नेतको भनाइ छ । मटन खानासँगै एक बोतल मिनरल वाटर पनि निशूल्क दिने बस्नेतले बताउनुभयो ।
बिहान १० बजेदेखि दिउँसो २ बजेसम्म मात्रै खानाको सेवा रहने बस्नेतले बताउनुभयो । सेकुवा विशेष रेष्टुरेन्टको रुपमा सञ्चालनमा आएको जंगे सेकुवामा साँझ बढी सेवाग्राही आउने र बिहानदेखि दिउँसोसम्मको खाली रहने समयमा खाना खुवाउने योजना बनाएको उहाँको भनाइ छ । बजारमा मटन खानाको ६ सय रुपैयाँसम्म लिने गरिएकोमा सेवाग्राहीलाई मार्का परेको महसुस गरी सहुलियत दर कायम गर्न खोजिएको उहाँले स्पष्ट पार्नुभयो ।
यसअघि तयारी पोशाकको व्यवसाय गर्दै आउनुभएका बस्नेत कोभिडको समयदेखि होटल व्यवसायमा प्रवेश गर्नुभएको हो । बारा जिल्लाको कलैयामा पाइने गुणस्तरको सेकुवा खुवाउने लक्ष्यसहित सुरु गरिएको जंगे सेकुवा छोटो समयमै स्वादका पारखीको आकर्षणको केन्द्र बनेको छ । सेकुवा, नास्तासहितको रेष्टुरेन्टको व्यवसाय राम्रो भइरहँदा आर्थिक लाभ मात्रै नभई सेवामुखी हुने उद्देश्यले मटन खानाको सेवा विस्तार गर्न लागिएको बस्नेतको भनाइ छ ।
आफ्नो होटल आसपास हेटौँडा–काठमाडौं सुमो सेवाका काउन्टरहरु समेत भएकोले हेटौँडाबाट काठमाडौं आउ–जाउ गर्ने यात्रीका लागि पनि लक्षित गरेर मटन खानाको सेवा सञ्चालन गरिएको बस्नेतको भनाइ छ । पहिलो दिन बुधबार १५० देखि २०० जनालाई खाना खुवाउने लक्ष्य रहेको बस्नेतले बताउनुभयो ।
