हेटौँडाः नेकपा एमालेको मकवानपुरको कैलाश गाउँपालिकाको अधिवेशन शुक्रबार सम्पन्न भएको छ । अधिवेशनबाट नेकपा एमाले कैलाश गाउँ कमिटीको अध्यक्षमा सानुभाइ विष्ट निर्वाचित हुनुभएको छ । अध्यक्षका आकांक्षी पूण्य भण्डारीलाई १० मतान्तरले पराजित गर्दै विष्ट निर्वाचित हुनुभएको हो । ८९ जना प्रतिनिधि मध्ये ८५ जनाले मतदान गर्दा विष्टले ४७ मत पाउनुभयो भने भण्डारीले ३७ मत पाउनुभयो ।
उपाध्यक्षमा ओम बहादुर मुक्तान ४६ मतसहित विजयी हुँदा अर्का आकांक्षी रामबहादुर गोङ्वा पराजित हुनुभयो । सचिवमा बाबुराम मुक्तान सर्वसम्मत निर्वाचित हुनुभयो भने उपसचिवमा वीर बहादुर प्रजा ४४ मतसहित विजयी हुँदा पेम्बा योञ्जन ३१ मतसहित पराजित हुनुभयो । लेखा कमिटीको अध्यक्ष सजित कार्की सर्वसम्मत निर्वाचित हुनुभयो । गाउँ कमिटीका अन्य पदमा भने सर्वसम्मत चयन भएको उपाध्यक्ष ओमबहादुर मुक्तानले जानकारी दिनुभयो । कैलाश गाउँपालिका–३, कालिकाटारमा अधिवेशन भएको हो ।
यसअघि नेकपा एमालेको हेटौँडा उपमहानगरपालिका, मनहरी गाउँपालिका र राक्सिराङ गाउँपालिका कमिटीको अधिवेशन सम्पन्न भइसकेको छ ।
