हेटौंडाः हेटौंडा–११ मा भएको टोलस्तरीय वडाध्यक्ष कप रनिङ शिल्ड पुरुष भलिबल प्रतियोगिताको उपाधि आयोजक दुम्सीडाँडा टोल विकास संस्था ‘सी’ ले जितेको छ । बुधबार भएको फाइनल खेलमा गणेशस्थान टोल विकास संस्थालाई ३–० को सोझो सेटले हराउँदै आयोजक दुम्सीडाँडा ‘सी’ ले उपाधि जितेको हो ।
गणेशस्थानलाई आयोजकले क्रमशः २५–१३, २५–१० र २५–१२ सेटले पराजित गरेको होे । उपाधि जितेसँगै आयोजकले टिमले ३० हजार रुपैयाँ नगदसहित शिल्ड, मेडल तथा प्रमाणपत्र प्राप्त गरेको छ भने उपविजेताले २० हजार रुपैयाँसहित शिल्ड, मेडल तथा प्रमाणपत्र प्राप्त गरेको छ । प्रतियोगितामा तृतीय हुने दुम्सीडाँडा ‘बी’ टिमले १० हजार रुपैयाँसहित मेडल तथा प्रमाणपत्र प्राप्त गरेको छ ।
प्रतियोगिताको सर्वोकृष्ट खेलाडी आयोजक दुम्सीडाँडा ‘सी’ का निश्चल राना मगरल घोषित भए । उत्कृष्ट डिफेन्स विजेता टिमको संगीत परियार, उज्ज्वल राना मगर उत्कृष्ट ब्लगर, सुशान्त आले मगरल उत्कृष्ट सेटर र उत्कृष्ट स्पाइकर गणेशस्थान टोल विकास संस्थाका नवीन थापा मगर घोषित भएका छन् । आयोजक टोलका अध्यक्ष शिव प्रसाद अगस्तीको सभाध्यक्षमा तथा वडाध्यक्ष जुना दहालको प्रमुख आतिथ्यमा पुरस्कार वितरण समारोह भएको हो ।
