हेटौँडाः बागमती प्रदेश सरकारको मन्त्रिपरिषद् बैठकले पदक विजेता खेलाडी पलेशा गोवद्र्धन र एरिका गुरुङलाई प्रदान गरेको पुरस्कार वापतको रकम निकासा गर्ने निर्णय गरेको छ । बुधबार बसेको मन्त्रिपरिषद् बैठकले गत असोज ३ मा पलेशा र एरिकासहित उनीहरुका प्रशिक्षक तथा प्रदेशस्तरका कराँते, तेक्वान्दो संघलाई वितरण गरिएको पुरस्कार वापतको रकम निकासा गर्ने निर्णय गरेको हो ।
बैठकले आर्थिक मामिला तथा योजना मन्त्रालय मार्फत् खेलाडी प्रोत्साहन तथा पुरस्कार वितरण अन्तर्गत युवा तथा खेलकुद मन्त्रालयलाई २३ लाख रुपैयाँ रकम निकासा दिने निर्णय गरेको सरकारका प्रवक्ता एवम् आन्तरिक मामिला तथा कानुन मन्त्री सुरजचन्द्र लामिछानेले जानकारी दिनुभयो । उहाँका अनुसार असोज ३ गतेको कार्यक्रममा प्रदेश सरकारको खेलाडी प्रोत्साहन तथा पुरस्कार वितरण अन्तर्गत एक लाख रुपैयाँ मात्र बजेट रहेकाले रकम वितरण गर्न नसकिएको उहाँले जानकारी दिनुभयो ।
“३ असोजमा कार्यक्रम गरेर सम्मान गरियो । सो समयमा घोषणा गरिएको रकम हाल निकासा गरिएको छ । जसमा पुरस्कार वापत २० लाख रुपैयाँ खर्च हुन्छ । ३ लाख रुपैयाँ सो शिर्षकमा रहने छ”, मन्त्री लामिछानेले भन्नुभयो । पेरिस पारा ओलम्पिकमा कास्य पदक दिलाएकी पलेशालाई प्रदेश सरकारले १० लाख रुपैयाँ, पलेशाका प्रशिक्षक कविराज नेगीलाई २ लाख र नेपाल तेक्वान्दो संघ बागमती प्रदेश समितिलाई १ लाख रुपैयाँ पुरस्कार घोषणा गरेको थियो ।
त्यस्तै १९ औं एसियाली खेलकुदमा करातेमा नेपाललाई ऐतिहासिक रजत पदक दिलाएकी एरिकालाई ५ लाख, उनको प्रशिक्षक कुशल श्रेष्ठलाई १ लाख र नेपाल कराते महासंघ बागमती प्रदेश समितिलाई १ लाख रुपैयाँ प्रदान गर्ने घोषणा गरेको थियो ।
