हेटौँडाः हेटौँडामा जारी तेस्रो संस्करणको राष्ट्रिय रोटरी मकवानपुर पिप्ले क्याम्पा भेट्रान्स फुटबल प्रतियोगिताको सेमीफाइनल समीकरण पूरा भएको छ । आइतबार बिहान हेटौँडा–५ स्थित पिप्ले–क्याम्पा रंगशालामा क्वार्टरफाइनल चरणको अन्तिम एक खेल सम्पन्न भएसँगै सेमीफाइनल समीकरण पूरा भएको हो । पोखराको बगरभाइ खलक भेट्रान्सलाई टाइब्रेकरमा ६–५ गोलले हराउँदै हरिवन भेट्रान्स सेमीफाइनलमा प्रवेश गरेको छ ।
खेलको निर्धारित समय एक–एक गोलको बराबरीमा सकिएपछि नतीजाका लागि टाइब्रेकरको सहारा लिनुपरेको थियो । टाइब्रेकरमा दुबै पक्षका ५–५ जना खेलाडीहरुले बल प्रहार गर्दा दुई पक्षकै ४–४ जना खेलाडीको प्रहार गोलमा परिणत भएको थियो । त्यसपछि नतीजाका लागि सडनडेथमा धकेलिएको थियो । सडनडेथमा हरिवन भेट्रान्स विजयी भएको हो ।
प्रतियोगिता अन्तर्गत आज आइतबार दिउँसो पहिलो सेमीफाइनल खेलमा जीतपुर–सिमरा उपमहानगरपालिकाको नवजनजागृति भेट्रान्स सिमरा र झापाको पूर्वेली भेट्रान्सबीच प्रतिस्पर्धा हुनेछ भने भोलि सोमबार दोस्रो सेमीफाइनल खेलमा काठमाडौं महानगरपालिकाको फ्रिडम फाइटर भेट्रान्स र हरिवन भेट्रान्सबीच प्रतिस्पर्धा हुनेछ ।
प्रतियोगिताको उपाधि विजेता टिमले दुई लाख दुई हजार दुई सय २२ रुपैयाँ र उपविजेता टिमले एक लाख एक हजार एक सय ११ रुपैयाँसहित शिल्ड, मेडल तथा प्रमाणपत्र प्राप्त गर्नेछ । प्रतियोगितामा सर्वोकृष्ट प्रशिक्षकले १० हजार रुपैयाँ, सर्वोकृष्ट खेलाडीले ५ हजार रुपैयाँ, सर्वोकृष्ट गोलरक्षक, डिफेन्स, मिडफिल्डर र फरवार्डले ५–५ हजार रुपैयाँ नगद राशि प्राप्त गर्नेछन् ।
