हेटौँडाः सिन्धुलीको कमलामाई नगरपालिका–२, चियाबारीमा बोलेरो गाडी आफै अनियन्त्रित भई सडकमा पल्टँदा ३ जनाको मृत्यु भएको छ । बिहीबार बिहान ९ बजेर २२ मिनेटको समयमा बिपि राजमार्गमा अन्र्तगत गोलोन्जोर गाउँपालिका–६, नाकाजोलीबाट सिन्धुली तर्फ आउँदै गरेको बा २० च ८२८३ नम्बरको बोलेरो अनियन्त्रित दुर्घटना भएको बागमती प्रदेश प्रहरी कार्यालय हेटौँडाले जानकारी दिएको छ ।
दुर्घटना हुँदा गाडिमा सवार ३ जनाको मृत्यु भएको थियो भने ११ जना घाइते भएका थिए । मृत्यु हुनेमा गोलान्जोर गाउँपालिका–६ नाकाजोली बस्ने ४२ वर्षीय पृथ्वी भुजेल, ४५ वर्षीय उदय लुङ्गेली मगर र ३५ वर्षीय पवन मस्राङ्गीको उपचारको क्रममा जिल्ला अस्पताल सिन्धुलीमा मृत्युु भएको थियो । घाइते मध्ये ६ जनालाई जिल्ला अस्पताल सिन्धुलीमा सामान्य उपचार पश्चात थप उपचारका लागि धुलिखेल अस्पताल रिफर गरिएको र ५ जनाको जिल्ला अस्पताल सिन्धुलीमा नै उपचार भईरहेको प्रहरीले जानकारी दिएको छ ।
