हेटौँडाः हेटौँडामा जिल्लास्तरीय वक्तृत्वकला प्रतियोगिता हुने भएको छ । नमुना बचत तथा ऋण सहकारी संस्थाको अयोजना तथा साहित्य संगम मकवानपुरको व्यवस्थापनमा यही साउन २४ गते प्रतियोगिता हुने भएको हो ।
साहित्य संगमले सोमबार एक सूचना जारी गर्दै प्रतियोगिताको बारेमा जानकारी दिएको छ । प्रतियोगितामा मकवानपुरको विभिन्न विद्यालयहरुबाट कक्षा ९ देखि १२ सम्मका विद्यार्थीहरु सहभागी हुन पाउने सूचनामा उल्लेख गरिएको छ । “आर्थिक समृद्धिमा सहकारीको भूमिका” विषयक वक्तृत्वकला प्रतियोगितामा सहभागी हुनका लागि प्रतियोगीहरुले साउन २२ गतेभित्र नाम दर्ता गराइसक्नुपर्ने संगमका अध्यक्ष डीबी बर्तौलाले जानकारी दिनुभयो ।
प्रतियोगितामा प्रथम, द्वितीय, तृतीय र सान्त्वना हुनेहरुले क्रमशः ५ हजार रुपैयाँ, ३ हजार रुपैयाँ, २ हजार रुपैयाँ र १ हजार रुपैयाँसहित प्रमाणपत्र प्राप्त गर्नेछन् । प्रतियोगिताहरुमा सहभागी प्रतियोगीहरुले ५ मिनेटसम्म आफ्नो प्रस्तुती दिन पाउनेछन् ।
