हेटौँडाः सशस्त्र प्रहरी बल नेपाल १४ नम्बर गण हेडक्वार्टरको आयोजनामा आगलागी नियन्त्रण सम्बन्धी अभ्यास प्रदर्शन गरेको छ । शुक्रबार हेटौँडा–८ स्थित हेटौँडा कपडा उद्योगको विद्यालय क्षेत्रमा अभ्यास प्रदर्शन गरिएको हो ।
सशस्त्र प्रहरी बागमती प्रदेश विपद् व्यवस्थापन गुल्म, रेडक्रस सोसाईटी मकवानपुर जिल्ला शाखा, हेटौंडा उपमहानगरपालिका नगर प्रहरी समेतको सहभागितामा संयुक्त रुपमा विपद् व्यवस्थापन अन्तर्गत आगलागी नियन्त्रण सम्बन्धी अभ्यास प्रदर्शन भएको हो । कार्यक्रममा गर्मीको समयमा आगलागी कसरी हुन्छ ? आगलागीका घटनाबाट कसरी सजकता अपनाउने ? आगलागी भएको अवस्थामा कसरी आगो नियन्त्रणमा लिने ? भन्ने विषयमा अभ्याससहित जानकारी गराएको थियो ।
सशस्त्र प्रहरी बल नेपाल १४ नम्बर गण हेडक्वार्टर मकवानपुरका गणपति सशस्त्र प्रहरी उपरीक्षक ज्ञान प्रसाद भुर्तेलको प्रमुख आतिथ्यमा कार्यक्रम भएको हो । कार्यक्रममा वडा अध्यक्ष रामकृष्ण थापा, हेटौँडा औद्योगिक क्षेत्र व्यवस्थापन कार्यालयकी संगीता कुँवर, जिल्ला प्रशासन कार्यालय मकवानपुरका अधिकृत सरोज पौडेल, नेपाल रेडक्रस सोसाइटी जिल्ला शाखा मकवानपुरका प्रमुख लक्ष्मण भट्टराईको उपस्थिति रहेको थियो ।
