हेटौंडाः मकवानपुरको कैलाश गाउँपालिकामा आयोजना हुने दोस्रो संस्करणको अध्यक्ष कप फुटबल प्रतियोगिताको खेल तालिका सार्वजनिक भएको छ । सोमबार एक कार्यक्रमका बीच आयोजक कैलाश खेलकुद विकास समितिले प्रतियोगिताको खेल तालिका सार्वजनिक गरेको हो ।
कैलाश–९ स्थित नामटारमा बुधबारबाट सुरु हुने ९ ए साइड प्रतियोगिताको उद्घाटन खेलमा वडा नम्बर ४ र १० भिड्ने भएको छ । वडा नम्बर १० प्रतियोगिताको साविक विजेता हो । विजयी टिमले बिहिबार वडा नम्बर १ सँग प्रतिस्पर्धा गर्नेछ । प्रतियोगिता अन्तर्गत बुधबार नै वडा नम्बर ५ र ९ बीच प्रतिस्पर्धा हुने भएको छ । वडा नम्बर ५ सावितको उपविजेता हो । विजयी टिमले बिहिबार वडा नम्बर ८ सँग प्रतिस्पर्धा गर्नेछ । यस्तै बिहिबारको खेलमा वडा नम्बर २ र ३, ६ नम्बर वडा र ७ नम्बर वडाबीच प्रतिस्पर्धा हुनेछ ।
नकआउट चरणमा हुने प्रतियोगिताको फाइनल खेलमा शनिबार हुनेछ । प्रतियोगिताको विजेता टिमले ७५ हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले ५० हजार रुपैयाँ प्राप्त गर्नेछन् । यस्तै सेमिफाइनलमा पराजित हुने दुई टिमलाई १०–१० हजार रुपैयाँ प्रधान गरिने जनाएको छ । प्रतियोगिताको बुधबार पालिकाका अध्यक्ष लोक बहादुर मोक्तानले उद्घाटन गर्नुहुनेछ । कैलाश खेलकुद विकास समितिका संयोजक मोहन वाईबाको सभाध्यक्षतामा भएको खेल तालिका सार्वजनिक कार्यक्रममा सदस्यहरु रविन्द्र थिङ, अशोक स्याङ्तन र एन्फा रेफ्री सन्तोष राई लगायतको उपस्थिति रहेको थियो ।
