हेटौंडाः मकवानपुर उद्योग वाणिजय संघ महिला उद्यमी विकास समितिको आयोजनामा आठौँ बागमती प्रदेशस्तरीय महिला उद्यमी प्रदर्शनी सुरु भएको छ । शुक्रबार हेटौंडा–२ स्थित पल्पसा सदनमा सुरु भएको महिला उद्यमी प्रदर्शनीको उद्घाटन बागमती प्रदेशका सामाजिक विकासमन्त्री कुमारी मोक्तानले गर्नुभयो ।
कार्यक्रमलाई सम्बोधन गर्नुहुँदै मन्त्री मोक्तानले स्थानीय सरकार र संघीय सरकारबीचको लागानीलाई स्थानीय तहमा ल्याउन आवश्यक रहेको बताउनुभएको छ । लगानीको सन्दर्भमा वडाबाट, पालिकाबाट र प्रदेश सरकारबाट भएका कार्यहरुको मध्यनजर गर्नुपर्ने उहाँले बताउनुभयो । महिलालाई अगाडि बढाउनका लागि प्रदेश सरकारले विभिन्न कार्यहरु गरिरहेको उहाँको भनाइ छ । महिलाले उत्पादन गरेको सामग्री बिक्री र उद्यमशीलताको विकासका लागि सबै महिलाले बजारिकरण गर्न जरुरी रहेको उहाँले दावी गर्नुभएको छ ।
हेटौंडा उपमहानगरपालिकाकी प्रमुख मीनाकुमारी लामाले उत्पादित वस्तुको प्रवद्र्धन गर्ने कार्यमा सबै लाग्नुपर्ने बताउनुभयो । सानासाना व्यापारी÷व्यवसायीको प्रर्वद्धन गर्ने कार्यमा सबै लाग्नुपर्ने उहाँले बताउनुभयो । मानिसहरुले दैनिक जीवनमा उपभोग गरेको सामग्रीहरु कहाँबाट र कस्तो सामग्री प्राप्त भइरहेको छ भन्ने कुरा मध्यनजर गर्नुपर्ने उहाँले प्रष्ट पार्नुभयो ।
प्रदर्शनीमा ललितपुरको सुइट ल्यान्ड, मकवानपुरको शोभा दिदीबहिनी तोफु उद्योग, चौघडाको लभ्ली न्यु क्रियसन गुडिया, बनेपाको टोपी, झोला र अमिलो, नेपाली उद्यमी महिला संघ सुनसरीको भुटेको मकै अचारहरुको स्टल राखिएको छ । यस्तै, मकवानपुरको दीप भोजपुर खुकुरी, कान्तिराजपथको स्वदेशी सुपर मार्केटको पास्ता, घिउ, चाउमिन, पापड र बिन्स बिक्रीका लागि प्रदर्शनीमा राखिएको छ । मदर्स म्याक नुहाउने साबुन, हेटौंडा गार्मेन्ट उद्यमी समूहका कपडाहरु, ललितपुरको मह र सौगल पाटन जेएएम अचार उद्योगका उत्पादन प्रदर्शनीमा छन् ।
प्रदर्शनीमा करिब ३७ वटा स्टल रहेका छन् । शनिबार सफल महिलाको उद्यमशीलताको विषयमा छलफल, आइतबार महिला उद्यमशीलताको विषयमा छलफल, सोमबार कृषिसम्बन्धी अन्तरक्रिया कार्यक्रम र समापन कार्यक्रम हुनेछ । कार्यक्रममा मकवानपुर उद्योग वाणिज्य संघका अध्यक्ष कृष्णकुमार गुप्ताको सभाध्यक्षता रहेको थियो । उद्घाटन कार्यक्रममा बागमती प्रदेशसभा सदस्य एकालाल श्रेष्ठ, बागमती प्रदेश उद्योग वाणिज्य संघका सदस्य उत्तम शर्मा ढकाल र हेटौंडा–११ का वडा अध्यक्ष जुना दहालको पनि उपस्थिति रहेको थियो ।
