हेटौँडाः अखिल नेपाल महिला संघ (अनेमसंघ) मकवानपुर जिल्ला समितिले आयोजना गरेको रक्तदान कार्यक्रममा २१ जना महिलाले रक्तदान गरेका छन् । ११४औं अन्तर्राष्ट्रिय श्रमिक महिला दिवसको अवसरमा सोमबार अनेमसंघ मकवानपुरले आयोजना गरेको कार्यक्रममा महिला मात्रैले रक्तदान गरेका हुन् ।
अनेमसंघ मकवानपुरकी अध्यक्ष सुमित्रा काफ्लेको अध्यक्षता तथा अनेमसंघ स्थायी कमिटी सदस्य एवम् मकवानपुर जिल्ला इन्चार्ज पद्मा पौडेलको प्रमुख आतिथ्यमा भएको उद्घाटन कार्यक्रममा नेकपा एमाले मकवानपुरका अध्यक्ष एका लाल श्रेष्ठको पनि आतिथ्य रहेको थियो । यस वर्ष “समान सहभागिता र सशक्तीकरणका लागि महिलामा लगानी” भन्ने मूल नाराका साथ अन्तर्राष्ट्रिय श्रमिक महिला दिवस मनाइँदैछ ।
साताव्यापी कार्यक्रमको पहिलो कार्यक्रमको रुपमा रक्तदान कार्यक्रम आयोजना गरिएको अनेमसंघ मकवानपुरकी अध्यक्ष सुमित्रा काफ््लेले जानकारी दिनुभएको छ । अन्तर्राष्ट्रिय श्रमिक महिला दिवसको अवसरमा अनेमसंघले स्लो स्कुटी रेस, क्याम्पसस्तरीय वक्तृत्वकला, महिला अधिकारको विषयमा अन्तरक्रियालगायतका कार्यक्रम आयोजना गर्ने अध्यक्ष काफ्लेले बताउनुभएको छ ।
