हेटौँडाः १६ औं निर्माण दिवसको अवसरमा निर्माण व्यवसायी संघले रक्तदान कार्यक्रमको आयोजना गरेको छ । शुक्रबार बिहान हेटौँडा–४ स्थित निर्माण व्यवसायी संघ मकवानपुरको कार्यालय परिसरमै आयोजना गरिएको कार्यक्रममा २२ जनाले रक्तदान गरेका छन् ।
संघका अध्यक्ष बालगोपाल कँडेलको अध्यक्षता तथा निर्माण व्यवसायी संघ मकवानपुरका पूर्वअध्यक्ष आनन्दराम पराजुलीको प्रमुख आतिथ्यमा रक्तदान कार्यक्रम भएको हो । रक्तदान कार्यक्रममा रक्तसञ्चार केन्द्र हेटौँडाको प्राविधिक सहयोग रहेको थियो । पछिल्लो समय रगतको मागमा कमि आएकोले रगतको व्यवस्थापन सहज भएको रक्तसञ्चार केन्द्र हेटौँडाका प्राविधिक किशोर सापकोटाले जानकारी दिनुभएको छ ।
