हेटौंडाः चितवनमा दुध बोक्ने ट्याङकरमा ठोकिंदा मोटरसाइकल चालकको मृत्यु भएको छ । शुक्रबार दिउँसो चितवनको भरतपुर महानगरपालिका–२९, पन्ध्र किलोमा सवारी दुर्घटना भएको प्रदेश प्रहरी कार्यालय हेटौंडाले जानकारी दिएको छ ।
मुग्लिङबाट नारायणगढ आउदै गरेको ग १६ प ६९६८ नम्बरको मोटरसाइकल बा–प्र–०१–००४ क ०५७३ नम्बरको दुध बोक्ने ट्याङकरमा ठोकिंदा मोटरसाइकल चालक पर्वत जिल्लाको दुर्लाङ–१ धौलागिरी बस्ने ५८ वर्षीय हर्क बहादुर सुनार गम्भिर घाइते भएका थिए भने मोटरसाइकलमा पछाडी सवार नुवाकोट शिवपुरी गाउँपालिका–६, बस्ने २९ वर्षीय सुबास तामाङ सामान्य घाईते भई उपचारको लागि नयाँ मेडिकल कलेज भरतपुर लगिएको थियो । उपचारको क्रममा मोटरसाइल चालक सुनारको मृत्यु भएको प्रहरीले जनाएको छ ।
