हेटौँडाः अवैध भारतीय रुपैयाँसहित मकवानपुर प्रहरीले एकजनालाई पक्राउ गरेको छ । मंगलबार बिहान ५ बजेको समयमा प्रहरी चौकी रातोमाटेले १ सय, २ सय र ५ सय दरका भारतीय रुपैयाँ प्रहरीले बरामद गरेको हो ।
सुरक्षाजाँच गर्ने क्रममा काठमाडौंबाट बीरगंजतर्फ जाँदै गरेको प्रदेश ३–००१ ख २५१६ नम्बरको यात्रुवाहक बसमा सवार भारतको जिल्ला बेतिया थाना बैरिया ग्राम मियापुर दवौली–७ का ४० वर्षीय रमेश साह गुप्तालाई अवैध भारतीय रुपैयाँसहित प्रहरीले पक्राउ गरेको हो । गुप्ताले कम्मरको भागमा कपडाले बेरी लुकाई छिपाई गरी ल्याएको अवस्थामा प्रहरीले भारतीय रुपैयाँ बरामद गरेको हो । प्रहरीले गुप्तालाई नियन्त्रणमा लिई आवश्यक कारवाहीको लागि राजश्व अनुसन्धान कार्यालय पथलैया, बारा पठाइएको जानकारी दिएको छ ।
