हेटौँडाः हेटौँडामा जारी तेस्रो संस्करणको मेयरकप फुटबलको फाइनलमा खेल आज शनिबार हुँदैछ । मेयरकपको उपाधिका लागि ११ र १५ नम्बर वडा भिड्दैछन् । खेल हेटौंडा–५ स्थित पिप्लेक्याम्पा रंगशालामा हुनेछ ।
प्रतियोगितामा १९ वटै वडाको सहभागिता रहेको थियो । बिहीबार भएको सेमिफाइनल खेलमा १३ नम्बर वडालाई टाइबे्रकरमा ३–१ गोलअन्तरले हराउँदै ११ नम्बर वडा फाइनलमा प्रवेश गरेको थियो । यता १५ नम्बर वडाले बुधबार भएको सेमिफाइनल खेलमा १४ नम्बर वडालाई पराजित गरी फाइनल प्रवेश गरेको थियो ।
प्रतियोगिताको विजेता टिमले नगद २ लाख रुपैयाँसहित शिल्ड, मेडल तथा प्रमाणपत्र प्राप्त गर्नेछ भने उपविजेता टिमले नगद १ लाख ५० हजार रुपैयाँ प्राप्त गर्नेछ । सेमिफाइनल प्रवेश गर्ने दुई टिमले ५०–५० हजार रुपैयाँ प्राप्त गर्नेछ । विधागत उत्कृष्ट खेलाडीहरुले ५–५ हजार रुपैयाँ प्राप्त गर्नेछन् ।
