हेटौँडाः बागमती प्रदेश खेलकुद प्रतियोगिताअन्तर्गत पुरुष फुटबलमा मकवानपुरले काभ्रेलाई सहजै पराजित गरेको छ । बिहिबार हेटौँडा–५ स्थित पिप्ले–क्याम्पा रंगशालामा भएको सेमीफाइनल चरणको खेलमा मकवानपुरले काभ्रेलाई ३–० गोलअन्तरले पराजित गरेको हो ।
सहज जितसँगै मकवानपुरले काठमाडौंसँगको उपाधि भिडन्त पक्का गरेको छ । बिहिबार नै भएको पहिलो सेमीफाइनल खेलमा ललितपुरलाई १–० गोलअन्तरले पराजित गर्दै काठमाडौं फाइनल प्रवेश गरेको थियो ।
मकवानपुरको जितमा कप्तान प्रितम स्याङ्बोले २ गोल गरे भने अर्को एक गोल अभिषेक लामाले गरे । पहिलो हाफको नवौं र ३१ औं मिनेटमा प्रितमले दुई गोल गरे भने अभिषेकले पहिलो हाफको इन्जुरी समयमा एक गोल गर्दै टिमलाई सहज जित उन्मुख गराएका थिए । पुरुष फुटबलको फाइनल खेल शनिबार पिप्ले–क्याम्पा रंगशालामा हुनेछ ।
