हेटौंडाः मकवानपुरको मनहरी गाउँपालिका–६, सुनाचुरीमा रहेको राष्ट्रिय माध्यमिक विद्यालयको व्यवस्थापन समितिको अध्यक्षमा शिवलाल मुक्तान चयन हुनुभएको छ । बुधबार बसेको विद्यालय व्यवस्थापन समितिको बैठकले मुक्तानलाई अध्यक्ष चयन गरेको हो ।
अध्यक्ष चयन गर्नुअघिको बैठकले रामबहादुर लोप्चन र चन्द्र गोङ्बालाई शिक्षासेवी, सहयोगीमध्येबाट विद्यालय व्यवस्थापन समितिको सदस्यमा मनोनित गरेको थियो । गत वैशाख ११ गते विद्यालयको ५४ औं अभिभावक भेला भएको थियो । उक्त भेलाले अभिभावक मध्येबाट विद्यालय व्यवस्थापन समितिको सदस्यमा ४ जना सदस्य सर्वसम्मत चयन गरेको थियो । अभिभावक मध्येबाट प्रकाश घिमिरे, शिवलाल मुक्तान, अमृता लामा र सविता स्याङ्तानलाई सर्वसम्मत सदस्य चयन गरिएको थियो ।
वडा प्रतिनिधीमा वडाध्यक्ष युवराज थपलिया, शिक्षक प्रतिनिधीमा सुवास श्रेष्ठ रहनुभएको विद्यालयका प्रधानाध्यापक सूर्य मोक्तानले जानकारी दिनुभयो । २०७९ माघ २० गते विद्यालय व्यवस्थापन समितिको म्याद सकिएपछि अभिभावक भेलाले नयाँ समिति चयन गरेको हो । विद्यालयको वार्षिक परीक्षा संचालन गरी नतिजा प्रकाशन गर्नुपर्ने भएकाले विद्यालय व्यवस्थापन समिति चयनमा ढिला भएको उहाँको भनाइ छ ।
