हेटौंडाः हेटौंडा उपमहानगरपालिका ४ नम्बर वडा कार्यालयको आयोजना तथा श्यामप्रसाद शर्मा स्मृति प्रतिष्ठानको व्यवस्थापनमा आयोजित कविता प्रतियोगितामा समर्पण न्यौपाने प्रथम हुनुभएको छ । शुक्रबार आयोजित शहीद विषयक कविता प्रतियोगितामा स्वस्तिका दहाल द्वितीय, रुपक घलान तृतीय हुँदा इलिसा पराजुली, कृतिका लौडारी र सरोज कुमार साह सान्त्वना हुनुभएको छ ।
प्रथमलाई सात हजार पाँच सय रुपैयाँ, द्वितीयलाई पाँच हजार पाँच सय रुपैयाँ, तृतीयलाई तीन हजार पाँच सय रुपैयाँ तथा सान्त्वना हुने तीनजनालाई जनही एक हजार रुपैयाँ नगदसहित प्रमाणपत्र वितरण गरिएको छ । कार्यक्रममा साहित्यकार तुल्सी थापा, तुलसी घिमिरे, आरसी रिजाल, रमेशमोहन अधिकारी र तीर्थदेवी सिलवाललाई सम्मान गरिएको छ । प्रतिष्ठानका अध्यक्ष ईन्द्रप्रसाद नेपालको अध्यक्षता तथा पूर्वसांसद केदार न्यौपानेको प्रमुख आतिथ्यमा कार्यक्रम भएको हो । प्रतियोगितामा ७३ वटा कविता समावेश थिए ।
