हेटौंडाः आज सोमबार बिहान ४ बजेको समयमा मनहरी गाउँपालिका–६ सुनाचुरीमा सवारी दुर्घटना हुँदा एक जनाको मृत्यु भएको छ । पुर्व पश्चिम सडकखण्डमा काकरभित्ताबाट काठमाडौंतर्फ जाँदै गरेको बा ५ ख ७९४३ नम्बरको यात्रुबाहक बसले बिपरित दिशाबाट आउँदै गरेको बागमती प्रदेश ०३ ००३ प ४९३१ नम्बरको मोटरसाइकललाई ठक्कर दिएको थियो ।
बसको ठक्करले मोटरसाइकल चालक मनहरी ६ नयाँबस्ती बस्ने २९ वर्षीय अविनाश गोलेको घटनास्थलमा नै मृत्यु भएको छ । घटना स्थलमा प्रहरी चौकी सुनाचुरीबाट प्रहरी सहायक निरीक्षक र ईलाका प्रहरी कार्यालय मनहरीबाट प्रहरी निरीक्षकको कमाण्डमा टोली खटिएको थियो । दुर्घटना भएको मोटरसाइकल, बस र बस चालक हेटौंडा उपमहानगरपालिका–१९ नेवारपानी बस्ने ५१ वर्षीयको मदन कुमार गोले प्रहरी चौकी सुनाचुरीको नियन्त्रणमा रहेको छ । घटनास्थलको मुचुल्का गरी मृतकको शव हेटौंडा अस्पताल तर्फ पठाईएको छ । बसको यात्रुहरुलाई अर्काे सवारी साधनमा गन्तव्यतर्फ पठाउने कार्य भईरहेको प्रहरीले जनाएको छ ।
