हेटौंडाः सहीद स्मारक सी डिभिजन लिगको छनौट प्रतियोगिता अन्तर्गत मकवानपुरको विजय युथ क्लब पहिलो खेलमा पराजित भएको छ । सोमबार काठमाडौंको एन्फा कम्प्लेक्समा भएको खेलमा विजय युथ ललितपुरको एफसी साउर्थनसँग १–० गोलअन्तरले पराजित भएको हो ।
खेलको पहिलो हाफमै साउर्थनले विजय युथविरुद्ध गोल गरेको हो । खेलको पहिलो हाफमै गोल व्यहोरेको र फरवार्ड लाइनमा थोरै कमजोरी हुँदा साउर्थनसँग पराजित भएको विजय युथका प्रशिक्षक विजयलाल श्रेष्ठले बताउनुभयो । विजय युथले अब बुधबार सिन्धुपाल्चोक एफसीसँग खेल्नेछ । सोमबारको खेलमा टिममा देखिएको केही कमजोरीलाई सच्याएर दोस्रो खेलमा जित निकाल्ने योजना रहेको प्रशिक्षक श्रेष्ठको भनाइ छ । अबको खेलमा एफसी विजय युथ सी डिभिजन छनौट हुने गरी खेल खेल्ने उहाँले बताउनुभयो ।
विजय युथले सी डिभिजन छनौटका लागि तेस्रो पटक प्रतियोगितामा सहभागिता जनाएको हो । यसअघि विजय युथ क्लब २ पटक सी डिभिजनमा छनौटका लागि प्रतिस्पर्धा गरेपनि असफल भएको थियो । सी डिभिजन लिग पुस ५ गतेबाट सुरु हुने कार्यतालिका रहेको छ ।
