हेटौंडाः हेटौंडामा जारी उपमेयर कप महिला तथा पुरुष भलिबल प्रतियोगिताको आइतबार महिला र पुरुष दुबै तर्फको फाइनल खेल हुँदैछ । महिलातर्फको फाइनलमा उपाधीका लागि अहिले वडा नम्बर ५ र १७ नम्बरबीच प्रतिस्पर्धा भइरहेको छ ।
हेटौंडा–४ स्थित हुप्रचौरमा जारी खेलमा दुबै टोली जित निकाल्ने योजनासहित मैदानमा उत्रेका छन् । शनिबार भएको सेमिफाइनल खेलमा १९ नम्बर वडालाई हराउँदै १७ नम्बर वडा फाइनल प्रवेश गरेको थियो । यस्तै, ९ नम्बर वडाले वडा बाहिरको खेलाडी खेलाएको भन्दै आयोजकले ५ नम्बर वडालाई विजयी घोषित गर्दै फाइनल खेल्ने अवसर दिएको थियो ।
यस्तै, पुरुषतर्फको फाइनल खेल पनि आज आइतबार हुँदैछ । खेल दिउँसो ३ बजे हुनेछ । फाइनलमा १७ नम्बर वडा र १९ नम्बर वडा भिड्नेछन् । आइतबार बिहान भएको सेमिफाइनलको खेलमा १७ नम्बर वडाले १२ नम्बर वडालाई २५–१९, २५–१७ र २५–१७ को सोझो सेटले हराउँदै फाइनल प्रवेश गरेको हो । यस्तै, १९ नम्बर वडाले ११ नम्बर वडालाई २५–१७, २५–१८, २३–२५, २०–२५ र १५–१० सेटले हराउँदै फाइनल प्रवेश गरेको हो ।
प्रतियोगिताको विजेताले नगद ५० हजार रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेता टिमले नगद २५ हजार रुपैयाँसहित शिल्ड, मेडल र प्रमाणपत्र प्राप्त गर्नेछ ।
