हेटौंडाः जिल्ला प्रहरी कार्यालय मकवानपुर र भैसेबाट खटिएको प्रहरी टोलीले बिहीबार बिहान ५ बजेको समयमा विशेष सूचनाको आधारमा एक सय ६० किलोग्राम लागुऔषध गाँजा, नगद र कारसहित एकजनालाई पक्राउ गरेको छ ।
प्रहरीले भैसे चेक पोष्टमा बा. २० च ६८ नं. को होण्डाई कारलाई रोक्न खोज्दा नरोकी भागेकोमा उक्त कारलाई पिछा गर्ने क्रममा बागझोरा स्थित सडकमा रोकी सुरक्षाजाँच गर्दा लागुऔषध गाँजा फेला पारेको थियो । कार चालक चितवनको भरतपुर महानगरपालिका वडा नं २४ बस्ने ४३ वर्षीयको टेक बहादुर गुरुङलाई कारको पछाडीको डिक्कीमा लुकाई छिपाई ल्याएको अवस्थामा लागुऔषध गाँजा १५ वटा पोकामा जम्मा १ सय ६० किलोग्राम र नगद १ लाख ३८ हजार रुपैयाँसहित प्रहरीले फेला पारेको थियो ।
उक्त लागु औषध, नगद र बा. २० च ६८ नं. को कारसहित टेक बहादुर गुरुङलाई नियन्त्रणमा लिई थप अनुसन्धान भईरहेको जिल्ला प्रहरी कार्यालय मकवानपुरले जनाएको छ ।
