हेटौंडाः हेटौंडा–५, सिचाईं टोल हुँदै मनकामना मन्दिर जाने बाटो शनिबार सरसफाई गरिएको छ । हेटौंडा उपमहानगरपालिकाको “सफा हेटौंडा अभियान” अन्तर्गत मनकामना मन्दिर जाने बाटो सरसफाई गरिएको हो ।
सरसफाई कार्यक्रममा जिल्ला बक्सिङ संघका २५ जना भन्दा बढी खेलाडीहरुको सहभागिता रहेको थियो । खेलाडीलाई खेलमा मात्र नभई सामाजिक क्षेत्रको कार्यक्रममा पनि सहभागी गराउने उद्देश्यले बक्सिङका खेलाडीहरुलाई सरसफाइ कार्यक्रममा सहभागिता गराइएको मकवानपुर बक्सिङ संघका प्रशिक्षक लाला पौडेलले जानकारी दिनुभयो । सरसफाई कार्यक्रम अन्तर्गत बाटो छेउछाउका झाडी सफा गर्ने र फलफुलका विरुवाहरु रोपिएको उहाँले बताउनुभयो ।
करिब आधा बाटोसम्ममा सरसफाई गरिएको छ । अब अर्को पटक माथि मन्दिरसम्मको बाटो सरसफाइ गरिने जनाइएको छ । सरसफाइ कार्यक्रममा हेटौंडा उपमहानगरपालिकाकी प्रमुख मिना कुमारी लामा, पुर्व नगर प्रमुख हरि बहादुर महत र हेटौंडा–५ का वडाध्यक्ष सुशील घिमिरे लगायतको सहभागिता रहेको थियो ।
